Dhule News : दोंडाईचा येथील उड्डाणपुलाचे कठडे जागोजागी तुटल्याने मोठी प्राणहानी होण्याची चिन्हे असून, कधीही मोठा अपघात घडू शकतो अशी आजची स्थिती आहे.

त्यात उंचीवर एकाच ठिकाणी जवळपास तीस फुटांपर्यंत कठडे तुटले आहेत, तसेच सिमेंट खांब निखळत असल्याचे दिसत असून, संभाव्य मोठा धोका निर्माण झाला आहे. (possibility of accident due to Dondaicha flyover damaged Dhule News )

ही परिस्थिती दिवसेंदिवस वाढत असल्याने संपूर्ण पुलाला कठडे बसविण्याची गरज निर्माण झाली आहे. याकडे राष्ट्रीय महामार्गाच्या अधिकाऱ्यांचे दुर्लक्ष होत असल्याने दिवसेंदिवस उड्डाणपुलाची स्थिती गंभीर होत असून, त्याची तत्काळ दुरुस्ती करण्याची मागणी होत आहे.

उड्डाणपुलाचे साधारणतः जवळपास १०० फूट उंचीवर बांधकाम झाले आहे. या उंचीवर सिमेंटचे खांब उभे करत फक्त लोखंडी पाइप लावून काम केले आहे. त्या कठड्याना खूप मोठा आधार आहे असेही नाही. जोरात वाहन धडकले की वाहन सरळ १०० फूट खाली जाऊ शकते.

या उड्डाणपुलावरून रोज शेकडो अवजड वाहनांसह लहान-मोठी वाहने धावत असतात. तसेच गुजरात व मध्य प्रदेशात याच मार्गाने जावे लागते. त्यामुळे उड्डाणपुलावर कायम वर्दळ असते. अशा स्थितीत अपघात झाला तर वाहन खाली जाऊ शकते. पुलाच्या मध्यभागी रेल्वे वीजवाहक तार आहे.

आजूबाजूला १०० फुटांवर दरी आहे. अशा स्थितीत रेल्वे उड्डाणपुलाचे कठडे आठ ते दहा ठिकाणी तुटलेले आहेत. यामुळे मोठा अपघात होण्याची चिन्हे असून, संभाव्य अपघात टाळण्यासाठी राष्ट्रीय महामार्गाच्या अधिकाऱ्यांनी लक्ष घालावे व पुलाच्या कठड्याची तत्काळ दुरुस्ती करावी, अशी मागणी होत आहे.

उड्डाणपुलाला ३० फूट कठडे नाहीत तेथे जैन सोशल ग्रुपने बांबू लावून लाल रिबन बांधण्यात आला होता. तो काही दिवस राहिला. कालांतराने तोही गेला.