अमरावती : अमरावती विभाग शिक्षक मतदारसंघाच्या निवडणुकीचे आता काऊंटडाऊन सुरू झाले असून आज(सोमवार)पासून शाळा सुद्धा सुरू झाल्या आहेत. त्यामुळे शाळेतील शिक्षकांना भेटी देण्याचे नियोजन या निवडणुकीतील उमेदवारांकडून करण्यात येत आहे. शाळेत एकाचवेळी अनेक शिक्षकांना भेट देणे सोयीचे असल्याने शाळा सुरू होणे ही बाब उमेदवारांच्या पत्थ्यावर पडणार आहे.   

हेही वाचा - ग्रामपंचायतीच्या निवडणुका पुन्हा लांबणार? इच्छुकांना करावी लागणार प्रतिक्षा

अमरावती विभाग शिक्षक मतदारसंघाची निवडणूक चांगलीच चुरशीची होण्याची चिन्हे आहेत. 1 डिसेंबरला मतदान होणार असल्याने त्यापूर्वी प्रमुख उमेदवारांनी शिक्षक असलेल्या मतदारांपर्यंत पोहोचण्यासाठी विविध क्‍लृप्त्या वापरल्या आहेत. सोशल मीडियाच्या माध्यमातून प्रचाराचा धुराळा उडत आहे. आरोप प्रत्यारोपांच्या फैऱ्या झडताहेत.

हेही वाचा - विनाअनुदानित शिक्षकांची आक्रमक भूमिका, उमेदवारांना...

विशेष म्हणजे पाच जिल्ह्यांचा विस्तार असलेल्या अमरावती विभाग शिक्षक मतदारसंघातील उमेदवारांना शिक्षक मतदारांच्या घरापर्यंत पोहोचण्यात चांगलाच घाम फुटलेला आहे. त्यांच्याशी वैयक्तिक संवाद साधताना त्यांची पार दमछाक होत आहे. अशातच आता शासनाने 23 नोव्हेंबरपासून इयत्ता 9 ते 12 वीपर्यंतच्या शाळा सुरू करण्याचा निर्णय घेतल्याने आजपासून शाळा सुरू झाल्या आहेत. तेथेच भेटण्याचे नियोजन उमेदवारांनी आखले आहे. त्यामुळे आता शाळेत येणाऱ्या उमेदवारांना शिक्षकांना भेटावे लागणार आहे.  एकूणच शाळा सुरू करण्याचा निर्णय उमेदवारांसाठी फायदेशीर ठरणारा आहे.