तिवसा (जि. अमरावती) : श्रावण बाळ योजना अनुदान हे 65वर्षा खालील महिला व पुरुष वर्गासाठी असून याचा लाभ हा तहसील कार्यालय स्तरावर घेतला जातो. मात्र, याच अनुदानापासून तिवसा तालुक्यातील शिरजगाव मोझरी येथील वृद्ध दाम्पत्य गेल्या तीन वर्षापासून वंचित असल्याने ते प्रशासनापुढे अनुदानासाठी दयायाचना करीत आहेत, तर  इतके वर्ष या अनुदानपासून का वंचित ठेवण्यात आले, असाही या वृद्ध दाम्पत्याकडून प्रश्न उपस्थित केला जातो आहे. 

हेही वाचा - शेतकरी दिवस : चौधरी चरणसिंह  केवळ सहा महिने पंतप्रधान...

65 वय व त्यावरील वृद्धांना श्रावणबाळ सेवा राज्य सेवानिवृत्ती योजना गट-ब मधून 400 रुपये प्रतीमाह प्रतिलाभार्थी निवृत्तीवेतन राज्य शासनाकडून देण्यात येते. याचा लाभार्थ्यांना केंद्र शासनाच्या इंदिरा गांधी राष्ट्रीय वृद्धापकाळ निवृत्तीवेतन येाजनेचे 200 रुपये प्रतीमाह प्रतीलाभार्थी निवृत्तीवेतन दिले जाते. यामुळे या लाभार्थ्यांना राज्य शासनाकडून 400 रुपये व केंद्र शासनाकडून 200 रुपये, असे एकूण 600 रुपये प्रतीमाह प्रतीलाभार्थी निवृत्ती वेतन मिळते. 
ही योजना सर्व सामान्य नागरिक वयोवृद्ध लोकांसाठी तहसील कार्यालयामार्फत राबविली जाते. मात्र, तिवसा तहसीलच्या एका चुकीच्या अहवालामुळे 75वर्ष पार झालेल्या वृद्ध दाम्पत्यांचे तीन वर्षापासून श्रावण बाळ योजनेचे अनुदानच बंद केल्याचा प्रकार समोर आला आहे. उत्तम बळीराम फटिंग (वय 75) तर त्यांच्या पत्नी सरस्वती उत्तम फटिंग (वय 70) असे या वृद्ध दाम्पत्यांचे नाव असून त्यांच्याकडे स्वतःची काही शेती असून त्यावरच त्यांचा उदरनिर्वाह चालतो. आधी मिळत असलेल्या अनुदानामुळे त्यांना थोडा हातभार लागत होता. मात्र, गेल्या तीन वर्षांपासून हे अनुदान रोखल्याने इतक्या वयात उदरनिर्वाह करण्यासाठी अडचणींचा सामना त्यांना करावा लागत आहे. त्यामुळे श्रावण बाळ योजनेचे अनुदान मिळविण्यासाठी हे वृद्ध आजही तहसील कार्यालयाच्या चकरा मारत आहे, तर तीन वर्ष आमचे अनुदान का रोखण्यात आले? हा देखील सवाल या वृद्ध दाम्पत्यांकडून उपस्थित केला जातो आहे. 

हेही वाचा - मेयोत रुग्णांच्या जीवाला धोका? अद्यापही नाहीत प्रशिक्षित 'ड्रेसर'

तीन वर्षांपूर्वी तलाठी यांचा अहवालात मुलगा नोकरी असल्याचे सांगून फटिंग यांचे श्रावण बाळचे अनुदान रोखण्यात आले होते, उत्तम फटिंग यांना एक विवाहित मुलगा असून ते एका खासगी संस्थेवर मानधन तत्वावर काम करत होते. मात्र, ते काम सुद्धा आता बंद झाले, तर संस्थेने 2018 मध्येच हंगामी अस्थायी प्रकारच्या कामावर असल्याचे पत्र दिले होते. मात्र, तरी सुद्धा आजपर्यंत फटिंग यांना श्रावण बाळचे अनुदान मिळाले नाही. 

हेही वाचा - हुंडाबळी : ‘माझ्या मुलाचा चांगला सांभाळ करा’ अशी चिठ्ठी लिहित महिला डॉक्टरने घेतला गळफास

गेल्या तीन ते चार वर्षांपासून आमचे अनुदान बंद आहे. वयाच्या 75व्या वर्षी सुद्धा श्रावण बाळचे अनुदान मिळत नाही. ही दुर्दैवी बाब आहे. माझ्याकडे दोन एकर शेती असून शेतीवरच उदरनिर्वाह होतो. तेव्हा प्रशासनाने सांगावे की ही योजना नेमकी कुणाला लागू होते. 
-उत्तम फटिंग, शिरजगाव, मोझरी. 

हेही वाचा - रात्र संचारबंदी सुरू : जीवनावश्यक वस्तूंच्या वाहनांनाच परवानगी; विनाकारण फिरणाऱ्यांवर कारवाई

वृद्ध दाम्पत्य शासकीय योजनेचे लाभार्थी असूनही त्यांना चुकीचा अहवाल देत लाभापासून वंचीत ठेवल्याने संबंधित कर्मचाऱ्यांवर कायदेशीर कठोर कारवाई करण्यात यावी. शिवाय गेल्या तीन वर्षातील योजनेतील लाभाच्या पैशांची प्रशासनाने भरपाई देऊन फटींग वृद्ध दाम्पत्याला न्याय द्यावा
- कल्याण कांबळे, सामाजिक कार्यकर्ते शिरजगाव.