नागपूर : लॉकडाऊनमुळे महावितरणसह देशातील सर्व वीज वितरण कंपन्या आर्थिक संकटात सापडल्यामुळे केंद्राने विजेला अत्यावश्‍यक सेवेत समाविष्ट करून राष्ट्रीय आपदा निवारण फंड (एनडीआरएफ) मधून तत्काळ आर्थिक मदत करणे गरजेचे आहे. केंद्राने महावितरणला विनव्याजी 5 हजार कोटींची मदत करावी, अशी मागणी राज्याचे ऊर्जामंत्री डॉ. नितीन राऊत यांनी केली आहे. 

अवश्य वाचा- भयंकर! पालकांनी मोबाईल कुठून आणला अस विचारलं म्हणून अल्पवयीन मुलीने घरच्यांच्या जेवणात कालवले विष

महावितरणला गत 2 महिन्यात 7 हजार 200 कोटींचे नुकसान सहन करावे लागले आहे. एप्रिल महिन्यात वीज बिलाची केवळ 40 टक्केच वसुली झाली आहे. मे महिन्यात ती 25 टक्के कमी होणार असल्याचा अंदाज आहे. केंद्रीय अर्थमंत्र्यांनी 90 हजार कोटी रुपयांचे पॅकेज वीज वितरण कंपन्यांना देण्याची घोषणा केली असून हे पैसे अनुदान स्वरूपात अथवा बिनव्याजी मिळाले तरच महावितरणला वीज खरेदीचे पैसे, कर्मचाऱ्यांचा पगार व इतर आवश्‍यक देणी देणे शक्‍य होणार आहे. केंद्राने वीज वितरण क्षेत्राला कर्जरुपी पैसे न देता आर्थिक आधार देण्याची हीच वेळ असल्याचे डॉ. राऊत म्हणाले.
 
आत्मनिर्भर भारत योजने अंतर्गत पॅकेजमधील 90 हजार कोटी रुपये वितरण कंपन्यांना नेमके कोणत्या स्वरूपात, किती रक्कम आणि कधी मिळणार हे अजून स्पष्ट झालेले नाही. हे पैसे पॉवर फायनान्स कॉर्पोरेशन व रूरल ईलेट्रीफिकेशन कॉर्पोरेशनकडून कर्जाच्या स्वरूपात मिळणार असल्याचे अर्थमंत्र्यांनी सांगितले आहे. मात्र त्यावर व्याज किती असेल?, कर्ज फेडीचे हप्ते किती असतील व अटी कोणत्या असतील हे अजूनही गुलदस्त्यातच आहे. याचा उलगडा लवकर झाल्यास त्यादृष्टीने पुढची पाउले उचलता येतील, असे मत डॉ. राऊत यांनी व्यक्त केले. 

स्थिर आकार रद्द करण्याची मागणी देखील उद्योजकांकडून होत आहे. लॉकडाऊनमुळे देशांतील वीज वितरण कंपन्यांना खूप मोठा तोटा सोसावा लागत असल्याने नुकसानभरपाईच्या स्वरूपात केंद्राने तातडीने मदत करावी, अशी आग्रही मागणी उर्जामंत्री यांनी केली आहे. 

राज्यात वीज दर वाढीची शक्‍यता 

केंद्र सरकारतर्फे दिल्या जाणाऱ्या कर्ज स्वरुपातील पॅकेजमुळे ग्राहकांवर बोजा पडणार असून वीजदरवाढ होणार असल्याची शक्‍यता नाकारता येत नसल्याची माहिती ऊर्जामंत्री नितीन राऊत यांनी दिली. केंद्र सरकार महाडीस्कॉमला मदत स्वरूपात कर्ज देणार आहे. या कर्जाचा व्याज 6 ते 8 टक्‍क्‍यांपर्यंत असेल. याचा भुर्दंड ग्राहकांवर पडेल, असे ते म्हणाले.