नागपूर : राष्ट्रसंत तुकडोजी महाराज नागपूर विद्यापीठाच्या अंतिम सत्रांच्या परीक्षा संपल्या असून आता विद्यार्थ्यांना निकालाची प्रतीक्षा आहे. अद्याप विद्यापीठाचे ६३७ निकाल लागले असून एका आठवड्यात उर्वरित ३८० निकाल लावण्यात येणार आहे. आज विद्यापीठाद्वारे बीए आणि बीएसस्सीचा निकालाची घोषणा करण्यात आली.

विद्यापीठाद्वारे ८ ते ३१ ऑक्टोबरदरम्यान अंतिम सत्रातील १ हजार २० अभ्यासक्रमांची ऑनलाइन परीक्षा घेण्यात आली. या परीक्षेदरम्यान विद्यापीठाला बऱ्याच अडचणींचा सामना करावा लागला. मात्र, त्या अडथळ्यांची शर्यत पार करीत विद्यापीठाने यशस्वीरीत्या परीक्षा पार पाडली. आता विद्यापीठासमोर वेळेत निकाल लावण्याचे मोठे आव्हान आहे. त्यामुळे परीक्षा विभागाची सर्व यंत्रणा कामाला लागली आहे.

हेही वाचा - आता बांबूच्या बाटलीने प्या पाणी, नैसर्गिक चवीसोबत आरोग्याचंही रक्षण

निकालात सर्वाधिक विद्यार्थी बीए, बीकॉम आणि बीएसस्सी अभ्यासक्रमाचा समावेश आहे. विद्यापीठाद्वारे या अभ्यासक्रमाचे निकाल जवळपास लावण्यात आले आहेत. आता केवळ एमए, एम.कॉम, एमएसस्सी यासारख्या पदव्युत्तर अभ्यासक्रमांचा समावेश आहे. हे सगळे निकाल ३० नोव्हेंबरपूर्वी लावण्यात येणार असल्याचे परीक्षा व मूल्यमापन मंडळाचे संचालक डॉ. प्रफुल्ल साबळे यांनी सांगितले.

आज विद्यापीठाद्वारे बीए आणि बीएसस्सीचा निकालाची घोषणा करण्यात आली. यामध्ये बीएसस्सी अभ्यासक्रमात ९ हजार ८६८ तर बीए अभ्यासक्रमात दहा हजारावर विद्यार्थी होते. यानंतर इतर सेमिस्टरच्या अभ्यासक्रमांची महाविद्यालयस्तरावर परीक्षा घेण्यात येणार आहे.

अधिक वाचा - आईच्या हंबरड्याने पोलिसांचे पाणावले डोळे; घरातून निघून गेलेल्या मुलाचा घेतला फास्टट्रॅक शोध

डिसेंबर महिन्यात पदव्युत्तर प्रवेश

अंतिम वर्षाच्या परीक्षेचे निकाल आल्यावर पदव्युत्‍तर अभ्यासक्रमासाठी विद्यापीठाद्वारे ऑनलाइन प्रवेश प्रक्रिया राबविण्यात येणार आहे. ही प्रक्रिया डिसेंबरच्या पहिल्या आठवड्यात सुरू करण्याचा विद्यापीठाचा मानस आहे. यानंतर महाविद्यालय आणि विभागातील प्रथम वर्षाच्या विद्यार्थ्यांचे वर्ग सुरू करण्यात येणार आहे. मात्र, हे वर्ग ऑनलाइन की प्रत्यक्ष याबाबत सरकारकडून आलेल्या दिशानिर्देशानंतरच स्पष्ट होणार आहे.

संपादन - नीलेश डाखोरे