नागपूर ः कुख्यात राजा गॅंगचा सदस्य असलेल्या विजय वागदरे याचा अज्ञात आरोपींनी दगडाने ठेचून खून केला. ही थरारक घटना आज रविवारी रात्री आठ वाजताच्या सुमारास घडली. धीरज आणि सुनील या दोन युवकांची संशयित आरोपी म्हणून नावे समोर आली असून पोलिस त्यांचा शोध घेत आहेत.

पोलिसांनी दिलेल्या माहितीनुसार, विजय वागदरे हा कुख्यात गुन्हेगार होता. तो तिरूपती भोगे आणि वसिम चिऱ्या गॅंगवारमध्ये सहभाही होता. त्याच्यावर आतापर्यंत बरेच गुन्हे दाखल आहेत. तो वस्तीतील व्यापारी आणि दुकानदारांकडून वसूली करीत होता. तसेच सामान्य नागरिकांना दमदाटी करून लुटमारही करीत होता. आज रविवारी दुपारी चार वाजता विजयने झेंडा चौकात नारायणपेठमध्ये राहणाऱ्या एका मुलाला विणाकारण मारहाण केली. त्या मुलाची आई रडत रडत प्रेमनगरात आली. 

 हेही वाचा - सकाळच्या वेळी शेतातून येत होता खळखळ आवाज; जाऊन बघताच...

नागरिकांनी तिची विचारपूस केली असता विजयचे नाव समोर आले. दरम्यान विजयचे मित्र सुनील आणि धीरज हेसुद्धा तेथे आले. त्यांच्याकडे त्या मुलाच्या आईने तक्रार करीत विजयला समजून सांगण्याची विनंती केली. काही वेळातच विजय प्रेमनगरात आला. त्याने सुनील आणि धीरज यांनाही शिवीगाळ केली. त्यामुळे चिडलेल्‍या दोघांनी विजयवर दगड-विटांनी हल्ला केला. विजयच्या डोक्यात दगड घातल्यामुळे त्याचा जागीच मृत्यू झाला. या प्रकरणी शांतीनगर पोलिसांनी हत्याकांडाचा गुन्हा दाखल केला असून आरोपींचा शोध सुरू आहे.

पोलिसांचे अपयश

विजय वागदरे याच्याविरूद्ध आतापर्यंत शांतीनगर पोलिस ठाण्यात डझनभर तक्रारअर्ज देण्यात आल्याची माहिती आहे. मात्र, पोलिसांनी तक्रारींना गांभीर्याने न घेतल्यामुळे विजयची हिम्मत वाढली. तसेच आज दुपारपासून विजय दारूच्या नशेत अनेकांना शिवीगाळ करीत होता. विजयच्या दशहतीमुळेच त्याचा गेम झाल्याचे बोलले जात आहे.

नक्की वाचा - बियर घेतल्यानंतर मालकानं केली मागील पैशांची मागणी अन्...

उपमुख्यमंत्री जाताच खून

शांतीनगरातील मुदलीयार लॉन येथे आयोजित उपमुख्यमंत्री अजीत पवार यांचा जाहिर कार्यक्रम संपताच कुख्यात गुंडाचा खून केल्याची घटना घडली. त्यामुळे पोलिसांचा वचक कमी झाला का? अशी शंका व्यक्त करण्यात येत आहे.

संपादन - अथर्व महांकाळ