हिंगणा (जि. नागपूर) : चुलत बहिणीशी प्रेमसंबंध असल्याच्या कारणावरून संतापलेल्या युवकाने गावातील तरुणाची हत्या करून मृतदेह दुचाकीसह विहिरीत फेकल्याची खळबळजनक घटना सुकळीगुपचुप येथे उघडकीस आली. हत्या करण्यात आलेल्या तरुणाचे नाव बंटी शामराव सिडाम (वय २४, रा. सुकळी गुपचूप) आहे.
पोलिसांनी दिलेल्या माहितीनुसार, बंटी सिडामच्या चुलत बहिणीशी गावातीलच धीरज झलके (३२) याचे प्रेमसबंध होते. याची कुणकुण लागताच बंटीने धीरजला याबाबत खडसावले. सहा आक्टोबर रोजी सायंकाळी पाच वाजताच्या सुमारास बंटी दुचाकीने जात असताना धीरजही त्याच्यासोबत गेला. धीरजने त्याला जबर मारहाण केली. त्याचा धारदार शस्त्राने गळा चिरला. गावातीलच शंभरकर यांच्या शेतशिवारातील विहिरीजवळ त्याचा मृतदेह ओढत नेला. पुरावा नष्ट करण्यासाठी दुचाकीला बंटीचा मृतदेह बांधला. त्यानंतर दुचाकीसह मृतदेह विहिरीत फेकून दिला.
कुटुंबीयांनी बंटी हरवल्याची तक्रार सहा ऑक्टोबरला सायंकाळी पोलिसात दाखल केली. सात ऑक्टोबरला सकाळीच शंभरकर यांच्या शेतशिवारातील विहिरीत मृतदेह आढळून आला. याची माहिती मृताच्या चुलत भावाने पोलिसांना दिली. सहा ऑक्टोबरला रात्रीच्या दरम्यान ही घटना घडली. सहायक पोलिस निरीक्षक अरविंद रघुवंशी व पोलिस उपनिरीक्षक विनोद नरवाडे यांचे पथक घटनास्थळी दाखल झाले. घटनास्थळी पंचनामा करून मृतदेह उत्तरीय तपासणीसाठी पाठवला.
या प्रकरणातील आरोपी धीरज झलके व इतरांविरुद्ध गुन्हा दाखल करण्यात आला आहे. घटनास्थळी पोलिस उपायुक्त विवेक मसाळ, सहायक पोलिस उपायुक्त सिद्धार्थ शिंदे, गुन्हे शाखेचे सहायक पोलिस उपायुक्त नंदनवार यांनी भेट दिली. घटनेचा पुढील तपास ठाणेदार सपना क्षीरसागर यांच्या मार्गदर्शनाखाली सहायक पोलिस उपनिरीक्षक रघुवंशी करीत आहेत.
मंगळवारी सायंकाळी साडेपाच वाजता बंटी दुचाकीने घराबाहेर पडला. सहा वाजताच्या सुमारास बंटीने आपला लहान भाऊ लोकेशच्या मोबाईलवर लाईव्ह लोकेशन पाठवले. अचानक आलेल्या लोकेशनमुळे भाऊ चिंतेत पडला. त्याने बंटीला फोन लावला, मात्र फोन स्विच ऑफ दाखवत होता. त्यानंतर बंटी बेपत्ता झाल्यामुळे त्याच्या व्हॉट्सॲप लोकेशनवरून गुमगावपासून ते महालक्ष्मी लॉनपर्यंत बंटीचा शोध घेतला. शेवटी बंटीचा मृतदेहच विहिरीत आढळला.
संपादन - नीलेश डाखोरे
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.