नागपूर : मी कधी थकत नाही. परंतु, कधी कधी काम करावे की नाही असे वाटते. कारण, एक लाख कोटींचा मुंबई-दिल्ली हायवे जागेचे अधिग्रहण करून ग्रीन हायवे बांधला. परंतु, महालामधील माझ्या घरासमोरचा राजे मुधोजी हा दोन किलोमीटरचा रस्ता बांधता बांधता मी थकून गेलो, असे सांगत केंद्रीय मंत्री नितीन गडकरी (Nitin Gadkari) यांनी एकच हशा पिकवला.

पुस्तक प्रकाशनाच्या सोहळ्यात नितीन गडकरी बोलत होते. सहा वर्षांपासून मी महालात गेलो नाही. या रस्त्याचे काम (Road construction) सुरू असताना किती लोक या कामाच्या विरोधात न्यायालयात जातात आणि किती न्यायाधीश या कामाला स्टे देतात. न्यायालयाचा पूर्ण आदर सन्मान राखत यावरही एखादे पुस्तक लिहावे, असेही नितीन गडकरी (Nitin Gadkari) म्हणाले.

येवढा मोठा हायवे दोन वर्षांत बांधून तयार झाला. परंतु, हा दोन किलोमीटरचा रस्ता करताना थकून गेलो. आता ठरवले की मॉडेल मिल चौकापासूनचा तो रस्ता मोठा (Road construction) करायचा आणि मेयो हॉस्पिटलपासून शहीद चौकापर्यंतचा रस्ता तोडून तो पुढे हरीहर मंदिरापर्यंत मोठा करायचे आहे, असेही ते म्हणाले.

फुटाळ्याच्या मागे पंजाबराव देशमुख विद्यापीठाच्या जागेवर तीन मजली इमारत तयार होते आहे. त्यामध्ये फूड मॉल आहे. फुटपाथवर खाणारे जे लोक आहे, त्यांची व्यवस्था तेथे करायची आहे. त्यासाठी त्या इमारतीमध्ये फेरीवाल्याचे दुकान असले पाहिजे. त्यामुळे गरिबांनाही मॉलमध्ये बसून खाता येईल. ते तीन मजले बनल्यानंतर वरती पुन्हा दोन मजले बनवायचे आहेत. तिथे तीन मल्टीप्लेक्स करायचे आहेत. त्याच्यावर रिव्हॉल्विंग रेस्टॉरंट बनवायचे आहे, असेही नितीन गडकरी (Nitin Gadkari) म्हणाले.