यवतमाळ :  हिवाळ्याच्या कडाक्‍याच्या थंडीत ऊब देणाऱ्या कपड्यांची गरज प्रत्येकालाच भासते. तिबेटियन नागरिकांनी थाटलेल्या स्वेटर दुकानांची ग्राहक वाट धरतात. यंदा प्रथमच कोरोनाने तिबेटियन विक्रेत्यांची वाट रोखली. त्याची उणीव ग्राहकांना भासत आहे.

हेही वाचा - हृदयस्पर्शी! मुळ गावी जाण्यासाठी कुटुंबीयांसह निघाला पती; वाटेत पत्नीने सोडली साथ,...

सांस्कृतिकदृष्ट्या संपन्न असलेल्या तिबेटवर चीनने कब्जा केला. तेथील नागरिकांचा अमानुष छळ केला. या अत्याचाराला कंटाळून तिबेटियन नागरिकांनी देशात आसरा घेतला. आपला देश एक दिवस स्वतंत्र होईल व मोकळा श्‍वास घेता येईल, ही आशा तिबेटियन नागरिकांना आहे. शांततेच्या मार्गाने भारतात राहून आंदोलनेही केली आहेत. आपला प्रदेश सोडून दुसरीकडे वास्तव्यास राहणाऱ्या तिबेटियन नागरिकांनी ऊबदार कपडे विक्रीचा व्यवसाय अनेक वर्षांपूर्वी निवडला. त्यातूनच त्यांनी उदरनिर्वाहाची समस्या निकाली काढली. राज्यासह जिल्ह्यात हिवाळ्यात येऊन स्वेटर विक्रीची दुकाने थाटायचे. मराठी माणसांसोबत त्यांचे जिव्हाळ्याचे संबंधही निर्माण झाले. अनेक वर्षांनंतर त्यांना प्रथमच व्यवसायाच्या निमित्ताने जिल्ह्यात येता आले नाही. त्यांच्या ठिकाणी स्थानिक विक्रेत्यांनी दुकाने थाटली आहेत. अजून म्हणावी तशी थंडी पडली नाही. त्यामुळे विक्रेत्यांना ग्राहकांची प्रतीक्षा आहे. आझाद मैदानात गेल्यास तिबेटियन नागरिकांची उणीव भासत असल्याची प्रतिक्रिया ग्राहकांकडून व्यक्त होत आहे.

हेही वाचा - VIRAL AUDIO : प्रचारासाठी उमेदवाराच्या मुलांनी केले...

फ्रिडम तिबेटची आठवण -
ग्राहकांची लूट रोखण्यासाठी तिबेटियन विक्रेत्यांनी "फिक्‍स रेट'चा पर्याय ठेवला. त्यामुळे लूट थांबल्याने खरेदीत होणारी घासाघीस थांबली, तर दुसरीकडे दुकानाच्या ठिकाणी 'फ्रिडम तिबेट', असे बॅनर लावून आपल्या मागणीकडे लक्ष वेधायचे, ही आठवणही येत असल्याचे ग्राहक सांगतात.

हेही वाचा - कोरोनाच्या दुसऱ्या लाटेसाठी प्रशासन सज्ज,...

लुधियानातून खरेदी -
तिबेटियन विक्रेते येणार नसल्याने या व्यवसायात स्थानिक नागरिक उतरले आहेत. त्यांनी लुधियाना येथून मालाची खरेदी केली. माल आणण्याच्या अधिक भुर्दंड बसल्याने ऊबदार कपड्याच्या भावात काही प्रमाणात वाढ करावी लागल्याचे एका विक्रेत्याने सांगितले.