रावणवाडी ( जि. गोंदिया ) : शेतकरी आपल्या शेतात बोरवेलचे खोदकाम करीत होते. याचवेळी अंदाजे 30 फूट दूर अंतरावरील अरुण हरिणखेडे यांच्या घरी असलेल्या विहिरीतून गढूळ अन्‌ थंडगार पाण्याचा प्रवाह वाहू लागला. पाहता पाहता संपूर्ण घर जलमय झाले. या घटनेची वार्ता कानोकानी पडताच हे दृश्‍य पाहण्यासाठी नागरिकांनी घटनास्थळी एकच गर्दी केली होती.   

हेही वाचा - धक्कादायक! राज्यातील १० हजारांपेक्षा अधिक शिक्षक होणार 'अतिरिक्त',...

येथील शेतकरी झाडूलाल बिसेन हे शनिवारी आपल्या मालकीच्या शेतात बोरवेलचे खोदकाम करीत होते. त्यांच्या शेतापासून अंदाजे 30 फुट दूर अंतरावर अरुण हरिणखेडे यांचे घर आहे. त्यांच्या घराच्या आवारात विहीर आहे. दरम्यान, बोरवेलचे खोदकाम सुरू असताना जमिनीचा एक हिस्सा खचला. पाहता पाहता, विहीर ओव्हरफ्लो झाली. विहिरीतून फवारे निघू लागले. गढूळ अन्‌ थंडगार असलेल्या पाण्याने हरिणखेडे यांचे संपूर्ण घर व्यापून टाकले. त्यामुळे घरातील दैनंदिन साहित्यांचे मोठे नुकसान झाले.

हेही वाचा - नागपूरवरून वर्धेत गेल्यानंतर युवकाने घेतले विष; नंतर...

अचानक घडलेल्या घटनेने हरिणखेडे यांच्यासह अन्य नागरिकदेखील अचंबित झाले. हा काय प्रकार असावा, म्हणून घटनास्थळी नागरिकांची मोठी गर्दी झाली. कोणी भीतीयुक्त वातावरणात वावरत होते. रात्री आठच्या सुमारास घडलेल्या या घटनेने भयभीत झालेल्या अरुण हरिणखेडे यांना गावातीलच आपल्या नातेवाइकांकडे रात्रभर मुक्काम ठोकावा लागला. दरम्यान, घटनेचे गांभीर्य ओळखून शेतकरी झाडूलाल बिसेन यांनी बोरवेल खोदकाम बंद केले असून, या घटनेची आज दिवसभर परिसरात चर्चा होती.