UAEच्या जागतिक चित्रकला स्पर्धेत नाशिकच्या चित्रकाराने मारली बाजी

डीजीपी नगर (नाशिक) : UAE च्या 50 व्या स्थापना दिनानिमित्त नुकत्याच पार पडलेल्या जागतिक चित्रकला स्पर्धेत नाशिकचे चित्रकार मोहन रमेश जाधव यांनी काढलेल्या चित्राला प्रथम पुरस्कार जाहीर झाला आहे. 1000 US डॉलर व प्रमाणपत्र असे या पुरस्काराचे स्वरूप आहे.

दुबई (Dubai) येथील आर्ट अँड क्राफ्ट्स संस्थेच्या मार्फत UAE@50 ही जागतिक चित्रकला स्पर्धा घेण्यात आली होती, यात 15 देशातील एकूण 104 कलावंतानी सहभाग घेतला होता. सर्व चित्रकारांनी आपल्या चित्रांच्या माध्यमातून UAE चा 50 वर्षाचा प्रवास व त्याची झालेली प्रगती चित्र स्वरूप मांडली होती.

या स्पर्धेत मोहन रमेश जाधव यांच्या चित्राला प्रथम पुरस्कार जाहीर झाला असून त्यांच्या या यशाचे सर्वत्र कौतुक होत आहे. मोहन रमेश जाधव यांनी आपले कलेचे शिक्षण चित्रकला महाविद्यालय तिळभांडेश्वर नाशिक येथुन केले असून पदव्युत्तर शिक्षण त्यांनी राष्ट्रसंत तुकडोजी महाराज विद्यापीठ नागपूर येथुन केले आहे.