अहमदाबाद (गुजरात) : महाराष्ट्र आणि मध्यप्रदेशनंतर आता गुजरातमधील शेतकऱ्यांनीही कर्जमाफीची मागणी केली आहे. शेतकऱ्यांनी दूध रस्त्यावर फेकून आंदोलनाला सुरुवात केली असून जर सरकारने मागण्या मान्य केल्या नाहीत तर तीव्र आंदोलन करण्याचा इशाराही दिला आहे.
क्षत्रिय ठाकोर सेनेच्या वतीने कर्जमाफीच्या मागणीसाठी हजारो लिटर दूध एका महामार्गावर फेकून देण्यात आले. अल्पेश ठाकोर यांच्या नेतृत्वाखाली या आंदोलनाला सुरुवात झाली. ठाकोर यांनी अलिकडेच शेतकरी त्यांचे दूध डेअरींना न विकता रस्त्यावर फेकून देणार असल्याचा इशारा दिला होता. प्रशासनाने हस्तक्षेप करून शेतकऱ्यांना दूध फेकण्यापासून रोखले. मात्र त्यामध्ये प्रशासनाला यश मिळाले नाही. याबाबत बोलताना ठाकोर म्हणाले, 'सध्या आम्ही संपूर्ण गुजरातमध्ये दोन दिवसांसाठी दूधावर बंदी आणली आहे. त्यांनतर आम्ही गांधी आश्रमापासून गांधी नगरपर्यंत रॅली काढणार आहोत. त्यानंतरही जर सरकारला जाग आली नाही, तर 8, 9 आणि 10 जुलैपासून कर्जमाफीच्या मागणीसाठी मोठ्या प्रमाणात निदर्शने केली जातील. त्यामध्ये राज्यभरातील शेतकरी सहभागी असतील.'
'जर सरकारने आमच्या मागण्या मान्य केल्या नाहीत तर संपूर्ण देशाला माहिती आहे की गुजरातमधील शेतकऱ्यांमध्ये सत्ताधाऱ्यांना खाली खेचण्याचे सामर्थ्य आहे', अशा शब्दांत ठाकोर यांनी सरकारला इशाराही दिला. शेती उत्पादनांचे कमी झालेले भाव आणि इतर मुद्यांमुळे अस्वस्थ झालेले गुजरातमधील शेतकरी कर्जमाफीची मागणी करत आहेत.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.