सिंधु पाणीवाटप करार उध्वस्त करण्याचा भारत,अमेरिकेचा डाव: पाकिस्तान

नवी दिल्ली - अमेरिका व भारताने एकत्रितरित्या सिंधु नदी पाणी वाटप करार उध्वस्त करण्याचे कारस्थान आखल्याचा आरोप पाकिस्तानचे नवे परराष्ट्र मंत्री ख्वाजा असिफ यांनी केला आहे. याशिवाय मंत्रिमहोदयांनी अफगाणिस्तानवरही दोषारोप केले आहेत.

"भारत हा अफगाणिस्तानने पाकिस्तानविरोधात आखलेल्या कारस्थानांना पाठिंबा देत आहे. याशिवाय पाकिस्तानच्या शांतता प्रयत्नांस भारताकडून प्रतिसाद दिला जात नाही. शेजारी देशांबरोबर शांतता व सलोखा राखण्यासाठी पाकिस्तानकडून करण्यात येत असलेल्या प्रयत्नांमुळे पाकिस्तान दुबळा देश आहे, असा समज करुन घेण्यात येऊ नये,' अशी टीका आसिफ यांनी केली आहे. पाकिस्तानचे परराष्ट्र मंत्री पद स्वीकारल्यानंतर आयोजित करण्यात आलेल्या पहिल्याच पत्रकार परिषदेत आसिफ बोलत होते.