पुणे-नाशिक राष्ट्रीय महामार्गावरील एकोणावीस मैल- खंदरमाळ (ता. संगमनेर) येथे कंटेनर दिंडीत घुसल्याने चार जण ठार झाले तर आठ जण जखमी झाले आहे. ही घटना रविवारी (ता. ३) दुपारी चार ते सव्वा चार वाजेच्या दरम्यान घडली.

शिर्डी येथील काशिनाथ महाराज माऊली यांची साईबाबा पालखी सोहळ्यात दीडशे वारकऱ्यांची दिंडी संगमनेरकडून संत ज्ञानेश्वर माऊलींच्या दर्शनासाठी आळंदीच्या दिशेने जात होती. रविवारी दुपारी चार ते सव्वा चार वाजेच्या दरम्यान दिंडी पुणे-नाशिक महामार्गावरून घारगावच्या दिशेने जात होती. एकोणावीस मैलाच्या पाठीमागे आली असता पाठीमागून भरधाव वेगात आलेला कंटेनर दिंडीत घुसला.

बाळासाहेब अर्जुन गवळी (रा.मढी, ता. कोपरगाव), बबन पाटीलबा थोरे (रा. व्दारकानगर, शिर्डी), भाऊसाहेब नाथा जपे (रा. कणकोरी, ता. राहाता), ताराबाई गंगाधर गमे (रा. कोन्हाळे, ता. राहाता) चौघेजण ठार झाले. बिजलाबाई शिरोळे(रा. वाळकी, ता. राहाता), राजेंद्र कारभारी सरोदे (रा.मढी, ता. कोपरगाव), भाऊसाहेब दसरथ गायकवाड़, ओंकार नवनाथ चव्हाण, निवृत्ती पुंजा डोंगरे, शरद सचिन चापके, अंकुश ज्ञानेश्वर कराळ, मिराबाई मारूती ढमाले हे आठजण जखमी झाले.

घटनास्थळी मोठी गर्दी झाली होती. वाहनांच्या दोन ते तीन किलोमीटर लांबच लांब रांगा लागल्या होत्या. डोळासणे महामार्ग, घारगाव पोलिस संगमनेर शहर पोलिसांनी घटनास्थळी धाव घेतली होती. जवळपास चार ते पाच रुग्णवाहिका घटनास्थळी आल्या होत्या. जखमींना औषधोपचारासाठी घारगाव, आळेफाटा येथे नेण्यात आले होते.

जिल्हाधिकारी सिध्दाराम सालीमठ, अपर पोलिस अधिक्षक स्वाती भोर, तहसीलदार धीरज मांजरे यांनी घटनास्थळी धाव घेतली. संध्याकाळी सात वाजता संगमनेर आगाराच्या चार बसेस घटनास्थळी आल्या. जिल्हाधिकारी सालीमठ, भगवान मथुरे, डॉ. सुरेश घोलप, उमेश पतंगे यांनी सर्व वारकऱ्यांना शिर्डीला रवाना केले.

मदतीच्या पालकमंत्र्यांच्या सूचना

शिर्डी : अपघाताबद्दल महसूलमंत्री राधाकृष्ण विखे पाटील यांनी दुःख व्यक्त केले. मृतांच्या व जखमींच्या वारसांना सर्वोतोपरी मदत करण्याच्या सूचना प्रशासनास दिल्या. अपघाताची माहिती मिळताच मंत्री विखे पाटील यांनी जिल्हाधिकारी सिद्धाराम सालीमठ, प्रांताधिकारी शैलेंद्र हिगे यांच्यासह पोलिस अधिकाऱ्यांना घटनास्थळी पाठवून जखमी वारकऱ्यांच्या उपचारासाठी सर्वतोपरी मदत करण्याच्या सूचना केल्या.

वारकऱ्यांना पुन्हा त्यांच्या गावी सोडण्यासाठी एसटी महामंडळाच्या वतीने चार बस उपलब्ध करून दिल्या. एकूण १३० वारकऱ्यांना रात्री आठ वाजता बस शिर्डी येथे घेऊन आल्या. या सर्वांची जेवणाची व्यवस्था साईबाबा संस्थानच्या प्रसादालयात करण्यात आली.