Jalgaon News : कानळदा (ता. जळगाव) येथे शुक्रवारी (ता. १९) अवैध वाळू नेताना एका बैलगाडीचालकाला महसूल पथकाने हटकले असता, त्याने कुटुंबीयांसह महसूल अधिकाऱ्यांना धक्काबुक्की, शिवीगाळ करीत बैलगाडीसह वाळू चोरून नेली. (bullock driver stole sand illegally jalgaon crime)

याप्रकरणी शासकीय कामकाजात अडथळा आणणे, धक्काबुक्की करणे, शिवीगाळ करणे आदी प्रकरणी तालुका पोलिस ठाण्यात गुन्हा दाखल झाला आहे.

कानळद्यात वाळूउपशाला नागरिकांचा विरोध आहे. यामुळे नागरिक नदीपात्रात ट्रॅक्टर, डंपर शिरू देत नाहीत. मात्र, काही वाळूचोरांनी आता ट्रॅक्टरऐवजी बैलगाडी नदीपात्रात नेऊन वाळू उपसून तिचा साठा करणे व विक्री करणे, असा वाळूचोरीचा नवा फंडा अवलंबिला आहे. नागरिकांनी या प्रकाराबाबत तहसीलदार विशाल सोनवणे यांना माहिती दिली.

श्री. सोनवणे यांनी दोन दिवसांपूर्वी कानळदा गावात जाऊन पाहणीही केली. वाळू जप्त केली. शुक्रवारी सकाळी मनोज रतन पारधी नदीपात्रात जाऊन अवैध वाळू काढत असल्याची माहिती पोलिसपाटील नारायण पाटील यांनी तहसीलदार सोनवणे यांना दिली.

त्यांनी मंडलाधिकारी किशोर बाविस्कर, किशोर ठाकरे, वाहनचालक मनोज कोळी यांना घेऊन कानळदा गाठले. तेथे वाळू वाहतूक करणाऱ्या मनोजला वाळूचा परवाना आहे का, अशी विचारणा केली.

मात्र, ‘परवाना नाही, आम्ही अशीच वाळू काढतो’. ‘तुमच्याकडून होईल ते करून घ्या’, असे सांगितले. त्यावर तहसीलदार सोनवणे यांनी ‘बैलगाडी आम्ही जप्त करतोय, पोलिस ठाण्यात चल’, असे सांगताच दीपक मनोज पारधी, सुनंदा पारधी यांनी येऊन महसूल अधिकारी, कर्मचाऱ्यांना शिवीगाळ करीत मंडलाधिकारी बाविस्कर यांची कॉलर पकडून धक्काबुक्की केली.

नंतर दोन बैल, वाळूसह बैलगाडी घेऊन घटनास्थळावरून पळ काढला. तालुका पोलिस ठाण्यात मनोज पारधी, दीपक पारधी, सुनंदा पारधी यांच्यावर गुन्हा दाखल दाखल करण्यात आला आहे.