राज्यात शिंदे-फडणवीस सरकार स्थापन होऊन बरेच दिवस झाले आहेत, मात्र अजूनही राज्यात या मंत्रीमंडळाचा विस्तार झालेला नाही. यावरून विरोधकांकडून मुख्यमंत्री शिंदेंवर टीकेची झोड उठवली जात आहे. दरम्यान, शिवसेना नेते आदित्य ठाकरे यांनीही राज्यामधील रखडलेल्या मंत्रीमंडळ विस्तारावरुन निशाणा साधला आहे. दोन लोकांचं जम्बो कॅबिनेट आपल्या महाराष्ट्रात आहे, असं म्हणत ठाकरेंनी शिंदे-फडणवीसांना टोला लगावला आहे. कायदेशीर लढाईबाबतीत भाष्य करताना, कायद्याप्रमाणे शिवसेनेची बाजू मजबूत आहे, असंही त्यांनी स्पष्ट केलं आहे. (Political latest update)

मानखुर्द येथे झालेल्या निष्ठा यात्रेदरम्यान बोलताना त्यांनी बंडखोर आमदारांवर निशाणा साधला आहे. ते म्हणाले, ही नुसती गद्दारी नाही झाली तर त्यांनी प्रामाणिक माणसाच्या पाठीत खंजीर खुपसला आहे. आमचं काय चुकलं की यांनी आमच्या पाठीत खंजीर खुपसला? असा प्रश्न आदित्य यांनी आपल्या भाषणामध्ये उपस्थित केला. तसेच माझ्या मनात राग नाही आणि कोणत्याच शिवसैनिकांच्या मनातही पक्ष सोडून गेलेल्यांबद्दल राग नाही. मात्र ज्या माणसाने यांना राजकीय ओळख दिली त्यांच्या पाठीत यांनी खंजीर खुपसाला याचं दुःख आहे, असंही त्यांनी स्पष्ट केलं.

पुढे ते म्हणाले, राक्षसी महत्त्वाकांक्षा घेऊन हे सरकार सत्तेत आलं आहे. हे सरकार कोसळणार म्हणजे कोसळणार, असं खोचक वक्तव्यही त्यांनी केलं आहे. विधानसभेमध्ये हे ४० गद्दार आरोपींप्रमाणे आले आम्ही १४ जण स्वाभिमानाने सभागृहामध्ये बसलो होतो. राष्ट्रपती पदाच्या निवडणुकीमध्येही ते कशापद्धतीने बसमधून आले आणि गेले हे आपण सर्वांनी पाहिलं, असा टोलाही आदित्य यांनी लगावला आहे.