अमरावती : हिंगोलीचे आमदार संतोष बांगर (Hingoli MLA Santosh Bangar) यांच्या ताफ्यावर शिवसैनिकांनी (Shiv Sainik) हल्ला केलाय. यावेळी शिवसैनिकांनी 'पन्नास खोके एकदम ओके' अशी नारेबाजी केली. अमरावती जिल्ह्यातील (Amravati District) अंजनगांव सुर्जी इथं हा हल्ला करण्यात आला. दरम्यान, या घटनेप्रकरणी 15 ते 20 जणांवर गुन्हा दाखल करण्यात आला आहे.

शिवसेनेतून (Shiv Sena) बंडखोरी करून शिंदे गटात गेलेले आमदार संतोष बांगर अंजनगांव सुर्जी येथील देवनाथ मठातून दर्शन घेऊन निघाले असता, शिवसैनिकांनी त्यांची गाडी अडवण्याचा प्रयत्न करत त्यांच्या वाहनाच्या ताफ्यावर हल्लाबोल केला. यावेळी शिवसैनिकांनी पन्नास खोके एकदम ओकेचे नारे दिले.

संतोष बांगर यांच्या वाहनांचा ताफा अंजनगांव सुर्जी इथं येताच कार्यकर्ते वाहतांना आडवे गेले. यावेळी आमदार ज्या बाजूला गाडीत बसले होते, त्या गाडीचा दरवाजा देखील उघडला आणि ‘शिवसेना जिंदाबाद’, ‘पन्नास खोके एकदम ओके’, ‘संतोष बांगर गद्दार है’ अशा घोषणा देत शिवसैनिकांनी त्यांच्या वाहनावर थापा मारल्या. परंतु, सुरक्षा रक्षकानं धाव घेत दरवाजा बंद केला. यावेळी शिवसैनिक खूपच आक्रमक झाले होते.

दरम्यान, या घटनेप्रकरणी 15 ते 20 जणांवर गुन्हा दाखल करण्यात आला असून हल्ल्याच्या आरोपात गुन्हे दाखल झालेले राजेंद्र अकोटकर, अभिजित भावे, महेंद्र दिपटे, गजानन विजयकर, गजानन चौधरी, रवींद्र नाथे, गजानन हाडोळे, मयूर रॉय, शरद फिसके यांनी सोमवारी दुपारी 1 वाजता आत्मसमर्पण केलं. आणखी पाच ते सहाजणांचा हल्लेखोरांमध्ये समावेश असल्याचं ठाणेदार वानखडे यांनी सांगितलं.