Maharashtra Political Crisis : ठाकरे सरकारमधील (Thackeray government) मंत्री आणि शिवसेनेच्या (Shiv Sena) प्रमुख फळीतील नेते एकनाथ शिंदे (Eknath Shinde) यांनी केलेल्या बंडखोरीनंतर राज्यातील वातावरण अधिकच तापताना दिसत आहे. एकनाथ शिंदे यांच्या बंडखोरीनंतर राज्यातील राजकारण ढवळून निघत आहे. शिवसेनेसाठी हा एक मोठा भूकंप मानला जात आहे.

शिंदे गटासोबत गेलेले आमदार आपण असा निर्णय का घेतला, याबाबत व्हिडिओ तसेच सोशल मीडियाच्या माध्यमातून सांगत आहेत. दरम्यान, महाराष्ट्रातील राजकीय पेचप्रसंगावर शेतकरी संघटनेचे नेते रघुनाथ पाटील (Raghunath Patil) यांनी आपली प्रतिक्रिया दिलीय. पाटील म्हणाले, उशिरा का होईना पण आई भवानीच्या कृपेनं महाराष्ट्रात पाऊस आला आहे. अशातच तुमचे मंत्री परराज्यात गेले आहेत. त्यास आठवडा उलटला तरी परत येण्याची चिन्ह दिसत नाहीत. त्यामुळं आता त्या सर्व मंत्र्यांची खाती तुमच्याकडं घेऊन मंत्रालयात बसून, सर्व खात्यांचा कारभार व्यवस्थित करावा, अशी विनंती रघुनाथ पाटील यांनी मुख्यमंत्री उद्धव ठाकरे (Uddhav Thackeray) यांनी केलीय.

विशेषत: कृषी खातं उपमुख्यमंत्री अजित पवार (Ajit Pawar) यांनी घेऊन राहिलेली कर्जमाफी, तसेच 50 हजार रुपयांचे सानुग्रह अनुदान ताबडतोब द्यावं, असंही पाटील म्हणाले. दरम्यान, ज्या ठिकाणी चांगला पाऊस झाला आहे, त्या ठिकाणी पेरणीची काम सुरु आहेत. पेरणीच्या कामासाठी शेतकऱ्यांना पैशाची गरज आहे. तसेच मुलांच्या शाळा सुरु होत आहेत. त्यासाठीही शेतकऱ्यांना पैशाची अत्यंत गरज आहे. त्यामुळं आमच्या विनंतीस मान देऊन 1 जुलै 2022 पर्यंत या गोष्टी पूर्ण कराव्यात, अशी विनंतीही पाटील यांनी मुख्यमंत्र्यांकडं केलीय.