पुणे : दिवसेंदिवस हवामानात बदल होत आहे. राजस्थान, दिल्ली, गुजरात यासह इतर राज्यांमध्ये उष्णतेच्या लाटांमुळे नागरिक हैराण आहेत. दुसरीकडे भारतीय हवामान विभागाने आज सोमवारी (ता.१८) पावसाचा अंदाज (Rain Forecast) वर्तवला आहे. येत्या २१ आणि २२ एप्रिल रोजी महाराष्ट्रातील विदर्भ, मराठवाडा, दक्षिण-मध्य महाराष्ट्र (Maharashtra) आणि दक्षिण कोकणात काही ठिकाणी वादळी वाऱ्यासह पाऊस पडेल, अशी शक्यता भारतीय हवामान विभागाने वर्तवली आहे.(Heavy Rain Hit Some Parts Of Maharashtra, Met Forecast)

या अवेळी पावसाचा फटका पिकांना बसू शकतो. तसेच देशातील आसाम व मेघालय राज्यात पावसासह गारपीठ होईल, असे हवामान विभागाने कळविले आहे. महाराष्ट्रात भारनियमन सुरु आहे. त्यात तीव्र उन्हामुळे राज्यातील नागरिक त्रस्त आहेत. मात्र हवामान विभागाने वर्तवलेल्या अंदाजाप्रमाणे पाऊस झाल्यास काही प्रमाणात दिलासा मिळू शकतो.

उन्हाळा सुरु झाल्यापासून राज्यात आतापर्यंत अनेकदा अवकाळी पाऊस पडला आहे. त्याचा फटका आंब्यासह इतर पिकांना बसलेला आहे.