शिवसेना नेते आदित्य ठाकरे यांच्या शिवसंवाद यात्रेच्या दुसऱ्या दिवशी आमदार सुहास कांदे हे एकनाथ शिंदे यांच्या गटात सामील झाले. यावेळी त्यांनी शिवसेना पक्षप्रमुख उद्धव ठाकरे यांच्यावर गंभीर आरोप केले आहेत. उद्धव ठाकरे यांच्या आदेशांमुळेच मुख्यमंत्री एकनाथ शिंदे यांना सुरक्षा नाकारण्यात आली असल्याचा गंभीर आरोप कांदे (Suhas Kande) यांनी केला आहे.

महाराष्ट्रात महाविकास आघाडी सरकारची सत्ता असताना एकनाथ शिंदे हे गडचिरोली जिल्ह्याचे पालकमंत्री होती. यावेळी नक्षलवाद्यांकडून शिंदे यांना जीवे मारण्याची धमकी देण्यात आली होती. त्यावेळी गुप्तचर यंत्रणांनी याची माहिती दिली होती. त्यावेळी गृहविभागाने शिंदेंना झेड प्लस सुरक्षा व्यवस्था देण्याचा निर्णय घेतला होता.

उद्धव ठाकरे यांनी तत्कालिन गृहमंत्री शंभुराज देसाई यांना फोन करुन झेड प्लस सुरक्षा देण्यास मनाई केली, असा दावाही सुहास कांदे यांनी केला आहे. आता यावर राज्यातील दोन गृहमंत्र्यांनी भूमिका स्पष्ट केली आहे. सुहास कांदेंच्या आरोपाला शंभुराज देसाईंचा दुजोरा दिला आहे.

काय म्हणाले शंभुराज देसाई?

सुहास कांदे यांनी केलला आरोप योग्य असून मला उद्धव ठाकरेंचा अशा पद्धतीचा फोन आला होता, असं त्यांनी सांगितलं आहे. एकनाथ शिंदे यांना माओवाद्यांचं धमकीचं पत्र आलं होतं. यामुळे त्यांच्या सुरक्षा व्यवस्थेत वाढ करण्याची गरज होती. सुरक्षा वाढवण्याचा निर्णय घेण्यात आला होता. मात्र, उद्धव ठाकरेंचा याला विरोध होता, असा दावाही त्यांनी केला होता.

यासंदर्भात, कॉंग्रसे नेते सतेज पाटील म्हणाले, सुरक्षेच्या बाबतीत मुख्यमंत्री किंवा गृहमंत्री कोणताही हस्तक्षेप करत नाहीत. मुख्य सचिवांच्या अंतर्गत ही समिती असते. अहवाल पाहिला जातो आणि मग त्याबाबतचा निर्णय घेतला जातो, असं सतेज पाटील यांनी सांगितलं. उद्धव ठाकरे यांच्याकडून अशी कोणतीही सूचना आली असेल यात तथ्य वाटत नाही, असंही त्यांनी स्पष्ट केलं आहे.