औरंगाबाद : शहरात मोकाट कुत्र्यांचा त्रास कायम आहे. त्यात दिवसेंदिवस रोगी कुत्र्यांची संख्या वाढत असून, सध्या सुमारे चार हजार कुत्र्यांना त्वचारोगाचा संसर्ग झाला आहे. उपासमारीमुळे हा त्वचारोग होत असल्याचे तज्ज्ञांनी सांगितले. दरम्यान, आधीच पावसाळ्याचे दिवस, त्यात मोकाट कुत्र्यांना होणारा त्वचारोगाचा संसर्ग यामुळे आजारी कुत्रे पिसाळून ते नागरिकांना चावण्याची भीती व्यक्त केली जात आहे.
कोरोना बाधित रुग्णांना काजू अन् अक्रोडचा खुराक
शहरातील मोकाट कुत्र्यांचा प्रश्न काही वर्षांपासून गाजत आहे. कुत्रा चावल्याने अनेकांचे बळीदेखील गेले आहेत. कुत्र्यांचे निर्बीजीकरण करून त्यांची संख्या नियंत्रणात आणण्यात महापालिकेला अपयश आले आहे. त्यामुळे मोकाट कुत्र्यांची संख्या ३५ ते ४० हजारांवर गेल्याचे महापालिकेचे अधिकारीच सांगतात. लॉकडाउनच्या काळात तर रस्त्याने माणसे कमी आणि मोकाट कुत्रेच जास्त दिसत होती. त्यात आता त्वचारोगामुळे कुत्र्यांच्या अंगावरचे केस गेले असून ते अशक्त दिसत आहेत. गल्लोगल्ली अशा कुत्र्यांची संख्या वाढली असून ते दिसेल त्या घरात घुसत आहेत.
जिल्हा परिषदेतील पशुवैद्यकीय अधिकाऱ्यांनी सांगितले, की कोरोनामुळे गेल्या तीन साडेतीन महिन्यांपासून लॉकडाउन होते. कुत्र्यांचा आहार मांसाहार आहे. या काळात मटण, चिकनची दुकाने बंद होती. त्यांना मांस, हाडे खायला मिळत नसल्याने त्यांना मिळणारे कॅल्शियम व इतर आवश्यक घटक कमी झाल्याने उपासमारीने अशक्तपणा आला आहे. अशक्तपणामुळे त्यांना झालेल्या त्वचारोगाची साथ पसरत आहे.
शहरात साठ हजार भटकी कुत्री
गेल्या दोन वर्षांपासून खासगी एजन्सीच्या माध्यमातून कुत्र्यांवर निर्बीजीकरण शस्त्रक्रिया केली जात आहे; मात्र कुत्र्यांची संख्या व शस्त्रक्रियेचे प्रमाण पाहता संख्या नियंत्रणात येऊच शकत नाही, असे तज्ज्ञांचे म्हणणे आहे. दरम्यान, मोकाट कुत्र्यांमध्ये आजाराचे प्रमाण वाढले आहे. औरंगाबाद पेट लव्हर्स असोसिएशनच्या म्हणण्यानुसार, शहरात ६० हजार भटके कुत्रे असून त्यापैकी जवळपास १५ टक्के कुत्र्यांना त्वचारोग झाला आहे. रोगाने त्रस्त असलेले कुत्रे माणसांवर हल्ला करण्याची शक्यता जास्त असते.
महापालिकेचे मुख्य पशुसंवर्धन अधिकारी डॉ. बी. एस. नाईकवाडे यांनी सांगितले, की महापालिकेने गेल्या ऑक्टोबरमध्ये ४७२ कुत्र्यांवर निर्बीजीकरण शस्त्रक्रिया केली आहे. त्वचारोग झालेल्या कुत्र्यांची माहिती नागरिकांनी महापालिकेला कळवावी. त्यांच्यावर उपचार करण्यात येतील. जे कुत्रे बरे होऊ शकणार नाहीत, त्यांच्याबाबत समितीमध्ये निर्णय घेऊन दयामरण दिले जाईल.
कुत्र्यांना गरज शेल्टर हाऊसची
तज्ज्ञांच्या मते, महापालिकेने मोकाट कुत्र्यांसाठी झोननिहाय एक शेल्टर हाऊस तयार केले पाहिजे. आजारी, रोगग्रस्त कुत्र्यांवर या ठिकाणी उपचार करून ते बरे झाल्यानंतर त्यांना सोडून दिले पाहिजे; मात्र महापालिकेचे असे कुठेच शेल्टर हाऊस नाही. महापालिकेच्या लेखी पशुसंवर्धन विभाग पूर्णपणे दुर्लक्षित आहे; तसेच मोकाट कुत्र्यांचा मृत्यू झाला तर त्याला उघड्यावर फेकून दिले जाते. त्यामुळे शहरात कुत्र्यांसाठी दफनभूमी करण्याची गरज तज्ज्ञांनी व्यक्त केली.
चावा घेतल्याने होतात जखमा
नुकताच श्रावण महिना लागला आहे. त्यानंतर भाद्रपद महिना सुरू होतो. या काळात मोठ्या प्रमाणात मोकाट कुत्र्यांची दहशत पसरते. आधीच त्वचारोग झाल्याने त्यात मोकाट कुत्र्यांचे भांडण होतात. त्यात एकमेकाला चावा घेतला की त्यांना जखमा होतात. त्यामुळे जखमा झालेली कुत्रे पिसाळण्याची शक्यता वाढते. त्यामुळे वेळीच त्यावर उपाययोजना करण्याची गरज निर्माण झाली आहे.
(संपादन - प्रताप अवचार)
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.