औरंगाबाद : कोरोना महामारीमध्ये ग्रामीण भागात सेवा देणाऱ्या जिल्हा परिषद आरोग्य विभागातील तब्बल ४८ वैद्यकीय अधिकारी तसेच काही तालुका वैद्यकीय अधिकाऱ्यांच्या वार्षिक वेतनवाढी प्रभारी जिल्हा वैद्यकीय अधिकारी डॉ. उल्हास गंडाळ यांनी सूड भावनेने रोखल्या असल्याच्या तक्रारी आहेत. तसेच प्रभारी असतांनाही धोरणात्मक निर्णय घेता येत नाहीत. परंतु डॉ. गंडाळ यांनी एका तालुका वैद्यकीय अधिकाऱ्याचा पदभार कसलीही तक्रार नसतानाही काढून घेतला आणि मर्जीतील अधिकाऱयाकडे तालुका वैद्यकीय अधिकारी पदाची खिरापत वाटल्याचीही चर्चा जिल्हा परिषदेच्या वर्तुळात दबक्या आवाजात सुरु आहे. 

मराठवाड्यातील अन्य बातम्या वाचण्यासाठी यावर क्लिक करा..!

आरोग्य विभागातील ४८ वैद्यकीय अधिकारी यांना त्यांच्या वैयक्तिक हक्काच्या वार्षिक वेतन वाढीपासून वंचित ठेवण्याचा घाट घातला गेल्याने प्रभारी जिल्हा आरोग्य अधिकारी गंडाळ यांच्या मेरी मर्जी कारभाराविरुद्ध तीव्र संताप व्यक्त केला जात आहे. जिल्हा परिषदेच्या आरोग्य विभागातील विविध प्राथमिक आरोग्य केंद्रामध्ये मध्ये कार्यरत असलेल्या वैद्यकीय अधिकाऱ्यांच्या वार्षिक वेतन वाढ सूड भावनेनेच रोखण्यात आल्याचा आरोप नाव न छापण्याच्या अटीवर एका वैद्यकीय अधिकाऱ्यांने सकाळ'शी बोलताना केला आहे. कोरोनायोद्धा म्हणून एकीकडे सन्मान करायचा आणि दुसरीकडे त्यांची वार्षिक वेतन वाढ रोखून आर्थिक कोंडी करायची या प्रकाराबद्दल वैद्यकीय अधिकाऱ्यांनी तीव्र नाराजी व्यक्त केली असून तात्काळ वार्षिक वेतनवाढी मंजूर कराव्यात अशी मागणीही केली आहे. 

औरंगाबाद जिल्ह्यातील महत्त्वाच्या बातम्या वाचण्यासाठी येथे क्लिक करा.

आवश्यक प्रमाणपत्रे सादर करण्याच्या सूचना : डॉ. गंडाळ 
दरम्यान वैद्यकीय अधिकाऱयांच्या वेतनवाढी रोखण्यात आल्याच्या प्रकाराबद्दल डॉ. उल्हास गंडाळ यांच्याशी संपर्क साधला असता त्यांनी या वृत्ताला दुजोरा दिला. त्यांनी "सकाळ"शी बोलतांना सांगितले की, आरोग्य विभागातील ४१ वैद्यकीय अधिकारी व तालुका वैद्यकीय अधिकाऱ्यांच्या वेतनवाढी शासनाच्या निर्देशानुसार आणि नियमांची पूर्तता न केल्याने रोखण्यात आल्या आहेत.

शासनाच्या २६ जून च्या पत्रानुसार स्थायित्व प्रमाणपत्र, मेडिकल फिटनेस चारित्र्य प्रमाणपत्र तसेच मराठी आणि हिंदी भाषा सुट प्रमाणपत्र वैद्यकीय अधिकाऱ्यांनी सादर करावे असे पत्र त्यांना दिले असून त्या नंतरच वेतनवाढीची प्रक्रिया केली जाईल असे पत्र सर्वांना दिले असून चर्चा देखील केली आहे असा दावा डॉक्टर गंडाळ यांनी केला आहे.

देशभरातील महत्त्वाच्या बातम्या वाचण्यासाठी येथे क्लिक करा.

तर गंगापूर येथील तालुका वैद्यकीय अधिकाऱ्यांचा पदभार तत्कालीन जिल्हाधिकारी उदय चौधरी यांच्या सांगण्यावरूनच काढण्यात आला असाही दावा त्यांनी केला आहे. पदभार काढतांना जिल्हाधिकारी यांच्या दूरध्वनी संभाषनानुसार बदलाची कारवाई केली असल्याचा शेराही त्या संचिकेवर आपण लिहिला असल्याची माहिती दिली व  सर्व नियमानुसारच केल्याचा दावाही डॉ. गंडाळ यांनी केला आहे.

(संपादन-प्रताप अवचार)