हिंगोली : औंढा नागनाथ तालुक्यातील सावळी येथील एका तरुणाचा डिग्रस कऱ्हाळे शिवारामध्ये शेतात दगड डोक्यात घालून व काठीने मारहाण करून खून झाल्याची घटना रविवारी (ता.२३) उघडकीस आली आहे. पोलिसांनी दिलेल्या माहितीनुसार औंढा नागनाथ (Aundha Nagnath) तालुक्यातील सावळी येथील सचिन धवसे (वय २५) हा तरुण शनिवारी रात्रीपासून बेपत्ता होता. कुटुंबीयांनी त्याचा सर्वत्र शोध घेतला. मात्र तो सापडला नाही. रविवारी सकाळी सावळी ते डिग्रस कऱ्हाळे शिवारात एका शेतात तरुणाचा मृतदेह आढळून आला. सावळी येथील गावकऱ्यांनी घटनास्थळी जाऊन पाहिले असता सदरील मृतदेह सचिन याचा असल्याचे स्पष्ट झाले. त्यानंतर गावकऱ्यांनी या घटनेची माहिती तातडीने औंढा नागनाथ पोलिस ठाण्याला दिली. (Brutally Killed Youth In Aundha Nagnath Taluka Of Hingoli)

औंढा पोलीस ठाण्याचे निरीक्षक वैजनाथ मुंडे, स्थानिक गुन्हे शाखेचे निरीक्षक उदय खंडेराय, पोलिस उपनिरीक्षक शिवसांब घेवारे, उपनिरीक्षक वाघमारे यांच्या पथकाने घटनास्थळी भेट दिली. आरोपींच्या शोधासाठी पोलिसांनी श्वानपथकाला पाचारण केले. श्वानपथकाने घटनास्थळापासून अर्धा किलोमीटर अंतरापर्यंत माग काढला. घटनास्थळी गावकरी मोठ्या संख्येने जमा झाले होते. पोलिसांनी अधिक माहिती घेतली असता मृत सचिन याचा डोक्यात दगड घालून तसेच काठीने मारहाण करून खून (Hingoli) झाल्याचे स्पष्ट झाले.

या प्रकरणात पोलिसांनी एका संशयिताला तातडीने ताब्यात घेतले तर अन्य दोघे जण फरार असून त्यांच्या शोधासाठी पोलिस पथके रवाना करण्यात आली आहेत. या खुनाचे नेमके कारण अद्यापही स्पष्ट झाले नाही. या प्रकरणात गुन्हा दाखल करण्याची प्रक्रिया सुरू असल्याचे पोलिसांनी सांगितले.