मुंबई : वांद्रे-कुर्ला संकुलातील (बीकेसी)1026 खाटांचे रुग्णालय मुंबई महापालिकेकडे हस्तांतरित झाले आहे.तेथील 1000 रुग्णांसाठी 100 डॉक्‍टरांसह त्याच प्रमाणात परिचारिका व अन्य कर्मचाऱ्यांची नियुक्ती करण्यात येणार आहे. त्याचबरोबर 1000 खाटांच्या नव्या रुग्णालयाचे बांधकाम सुरू करण्याचा विचार मुंबई महानगर प्रदेश विकास प्राधिकरण करत आहे. या विस्तारित रुग्णालयात 100 खाटांचा अतिदक्षता विभागही सुरू केला जाण्याची शक्यता असून, कोव्हिड चाचणीव्यतिरिक्त सर्व आवश्यक चाचण्या व उपचार होणार आहेत.

हे ही वाचा : अप्रतिम ! लॉकडाऊनमध्ये जोपासला अनोखा छंद, पक्षांच्या पिसांवर कोरलेली कलाकृती थक्क करणारी

बीकेसीतील मैदानावर सव्वा लाख चौरस फूट जागेवर अवघ्या 15 दिवसांत एमएमआरडीएने हे रुग्णालय उभारले आहे.पावसाळी तंबूच्या स्वरूपात उभारलेल्या या रुग्णालयासाठी 20 कोटी रुपयांचा खर्च आला आहे.तीन महिन्यांनी फक्त तंबूचे भाडे द्यावे लागणार असून, इतर सर्व साहित्याची खरेदी करण्यात आली आहे.तेथील 1026 खाटांसाठी महापालिका 100 डॉक्‍टरांची नियुक्ती करणार असून, त्यात एमडी (मेडिसीन) व भूलतज्ज्ञांचाही समावेश असेल.सध्या या रुग्णालयासाठी 13 डॉक्‍टर, 8 परिचारिका आणि 14 वॉर्डबॉयची नियुक्ती करण्यात आली आहे.
बीकेसी येथील रुग्णालयासाठी आवश्यकतेनुसार डॉक्‍टरांची नियुक्ती करण्यात येईल, असे महापालिकेच्या उप आरोग्य अधिकारी डॉ.दक्षा शहा यांनी सांगितले.या रुग्णालयाची जबाबदारी शीव येथील लोकमान्य टिळक रुग्णालयातील फॉरेन्सिक मेडिसीन विभागाचे प्रमुख डॉ.राजेश ढेरे यांना देण्यात आली आहे.अधिक माहितीसाठी त्यांच्याशी संपर्क साधण्याचा प्रयत्न केला; मात्र संपर्क होऊ शकला नाही.

नक्की वाचा : गुड न्यूज आली,  कोरोना संक्रमित मातांकडून 203 सुखरूप बाळांचा जन्म

एमएमआरडीए या रुग्णालयाचा विस्तार करण्याचा विचार करत आहे.रुग्णालयाच्या बाजूला 1000 खाटांचे विस्तारित रुग्णालय बांधण्याचा विचार असून, तेथे 100 खाटांचा अतिदक्षता विभाग सुरू करण्याबाबत दोन दिवसांत अंतिम निर्णय होण्याची शक्‍यता आहे.

हे वाचा : 'त्या' व्हिडिओवरुन काँग्रेस प्रवक्ते सचिन सावंत यांचा भाजपवर हल्लाबोल

10 मोबाईल आयसीयू 
या कोव्हिड रुग्णालयात 10 मोबाईल आयसीयू युनिट आहेत.अधिक गरज भासल्याच जवळील एशियन हार्ट इन्स्टिट्यूटने त्यांचे आयसीयू उपलब्ध करुन देण्याचे आश्‍वासन महापालिकेला दिले आहे.

महत्वाची बातमी : Coronavirus : आता फक्त 'यांना'च मिळणार विनामूल्य उपचार, कल्याण-डोंबिवली पालिकेचा निर्णय

प्रमुख वैशिष्ट्ये

• कोव्हिडचे सौम्य आणि मध्यम लक्षणे असलेले रुग्ण.
• पॅथॉलॉजी लॅब, ईसीजी, क्ष-किरण विभाग, ऑक्‍सिजन बेड.
• 18 वॉर्डमध्ये प्रत्येकी 28 खाटा; 504 खाटांसाठी कृत्रिम ऑक्‍सिजन.
• 9 वॉर्डमध्ये 58 अशा 522 खाटा; 10 मोबाईल आयसीयू.
• प्रत्येक वॉर्डला तीन स्वच्छतागृहे; गरज भासल्यास मोबाईल टॉयलेट. 
• डॉक्‍टर आणि वैद्यकीय कर्मचाऱ्यांची स्वतंत्र व्यवस्था.
• -नाश्ता, दोन वेळच्या जेवणाची सोय.

100 doctors for 1000 patients, BKC hospital starts within two days