कोयनानगर (जि. सातारा)  ः एक लाख रुपयांची खंडणी दे, नाहीतर तुझ्या नवऱ्याला ठार मारीन, अशी अंगणवाडी सेविकेला धमकी देणाऱ्या तीन खंडणीबहाद्दरांना कोयना पोलिसांनी शिताफीने अटक केली. देवानंद वाईकर (वय 20) व युवराज जाधव (वय 21, दोघेही रा. येराड) व राहुल देसाई (वय 31, रा. येराडवाडी-मल्हारपेठ) अशी अटक केलेल्यांची नावे आहेत.
 
पोलिसांनी दिलेल्या माहितीनुसार ः कऱ्हाड-चिपळूण रस्त्यावर कोयना विभागातील अंगणवाडी सेविकेला शुक्रवारी (ता. 31) दुपारी अज्ञाताने मोबाईलवरून फोन केला. "आम्हाला एक लाख रुपये दिले नाहीतर तुझ्या नवऱ्याला मारून टाकू,' अशी धमकी त्याने त्यांना दिली. त्यामुळे घाबरलेल्या अंगणवाडी सेविकेने घटनेची फिर्याद कोयना पोलिसांत दाखल केली.

पोलिसांनीही तपासाची चक्रे वेगवान फिरवली. ज्या मोबाईल नंबरवरून फोन आला होता, त्या मोबाईल नंबरचा सीडीआर तपासून गुन्ह्यातील संशयितांचा पोलिसांनी माग काढण्याचा प्रयत्न केला. मात्र, तो नंबर बंद ठेवल्याने तपासात अडचणी येत होत्या. एक फेब्रुवारीला दुपारी चार वाजता पुन्हा अंगणवाडी सेविकेला फोन करून पाटण बस स्थानकावर खंडणीतील पैसे आणून देण्यास सांगण्यात आले. पाटण बस स्थानकावर पोलिसांनी सापळा रचला. मात्र, या ठिकाणाहून पैसे नेण्यास कोणी आले नाही. त्यानंतर या सेविकेला पुन्हा फोन करून मणदुरे फाट्यावर पैसे घेऊन बोलावले. या ठिकाणी साध्या वेषात पोलिसांनी सापळा रचला. मणदुरे फाट्यावर अंगणवाडी सेविकेकडून पैसे घेण्यासाठी देवानंद वाईकर हा त्या ठिकाणी आला. त्याला पोलिसांनी ताब्यात घेतले. त्याच्याकडे सखोल चौकशी करताना राहुल देसाई व युवराज जाधव यांचाही सहभाग असल्याचे उघड झाले. या तीनही खंडणीबहाद्दरांना पोलिसांनी अटक केली आहे. सहायक पोलिस निरीक्षक एम. एस. भावीकट्टी तपास करत आहेत.

हेही वाचा -  Video पहा : डॅशिंग उदयनराजेंचं हळवं रुप!


जरुर वाचा - मंत्री,खासदारांच्या मागे-पुढे करत ते लाटत असत लाखाे रुपये - 


हेही वाचा -  धक्कादायक...बालिका बादलीत बुडाली

 

अवश्य वाचा - पोदार इंटरनॅशनल स्कूल विजेते; गुरुकुलचा धक्कादायक पराभव