सोलापूर : सोलापूर जिल्हा परिषदेवर शेकापसह महाविकास आघाडीचा अध्यक्ष करण्यासाठी मी राज्यातील सर्व पक्षप्रमुखांशी चर्चा करतो. जिल्हा परिषदेत सर्वांना सोबत घेऊन जाणारा उमेदवार द्या, अशी सूचना राष्ट्रवादी कॉंग्रेसचे अध्यक्ष शरद पवार यांनी आज जिल्ह्यातील राष्ट्रवादीच्या शिष्टमंडळाला केली. 

हेही वाचा : नवे वर्ष चाकरमान्यांसाठी 'फिलगूड'; सुट्यांच्या बोनसची संख्या मोठी 

मोहोळचे आमदार यशवंत माने यांच्या विजयी सत्कार सोहळ्यासाठी वेळ मिळावी, यासाठी आज माजी आमदार राजन पाटील यांनी बारामती येथे श्री. पवार यांची भेट घेतली. या भेटीत सत्कार सोहळ्यासोबतच संभाव्य अध्यक्ष निवडीबाबतही चर्चा झाली. मुख्यमंत्री उद्धव ठाकरे, माजी मुख्यमंत्री सुशीलकुमार शिंदे, महसूलमंत्री बाळासाहेब थोरात, माजी आमदार गणपतराव देशमुख यांच्याशी आपण स्वतः चर्चा करणार असल्याचेही श्री. पवार यांनी या शिष्टमंडळाला सांगितले. बुधवारी (ता. 18) शरद पवार हे नागपूरला रवाना होणार असून त्या ठिकाणी अध्यक्ष निवडीबाबत प्रमुख नेत्यांसोबत बैठक होण्याची शक्‍यता आहे. 

हेही वाचा : आर. आर. आबांच्या लेकीला पुत्ररत्न ! 

जिल्हा परिषदेत पुन्हा सत्ता मिळविण्यासाठी जिल्ह्यातील समविचारी नेते आणि भाजप एकवटले आहेत. या गटाच्याही बैठका सुरू असून उद्या (सोमवारी) अधिवेशनाच्या पहिल्या दिवशी विधानसभा विरोधी पक्षनेते देवेंद्र फडणवीस बैठक घेणार आहेत. आमदार विजयकुमार देशमुख, आमदार राजेंद्र राऊत, आमदार प्रशांत परिचारक यांच्यासह जिल्ह्यातील भाजप व समविचारीच्या नेत्यांसोबत ही बैठक होणार असून या बैठकीत अध्यक्षपदाच्या नावावर शिक्कामोर्तब होण्याची शक्‍यता आहे. 

25 डिसेंबरनंतर बैठक 
महाविकास आघाडीची उद्या (सोमवार) होणारी बैठक पुढे ढकलण्यात आली आहे. ही बैठक 25 डिसेंबरनंतर होण्याची शक्‍यता आहे. बैठक जरी पुढे ढकलली असली तरीही महाविकास आघाडीचा जिल्हा परिषद अध्यक्ष करण्यासाठी अंतर्गत भेटीगाठी सुरू आहेत. 
- बळिराम साठे, जिल्हाध्यक्ष, राष्ट्रवादी