पुणे - आगामी महापालिका निवडणूक काँग्रेसने स्वबळावर लढवावी. तसेच, या निवडणुकीसाठी सिंगल वॉर्डपद्धतीचा आग्रह धरावा, याबाबत काँग्रेसने बोलाविलेल्या बैठकीत चर्चा झाली. आगामी महापालिका निवडणुकीच्या तयारीसाठी बोलाविलेल्या या बैठकीत एका नेत्याने पक्षातील पाकीट संस्कृतीवर थेट हल्ला चढविला.
- पुण्याच्या बातम्या वाचण्यासाठी येथे ► क्लिक करा
आगामी निवडणुकींच्या तयारीसाठी महापालिकेतील गटनेते आबा बागूल यांनी महापालिकेत पदाधिकाऱ्यांची बैठक बोलविली होती. त्याला माजी आमदार उल्हास पवार, मोहन जोशी, बाळासाहेब शिवरकर, कमल व्यवहारे, वीरेंद्र किराड, दत्ता बहिरट. नगरसेविका सुजाता शेट्टी, लता राजगुरू उपस्थित होते. मात्र, विद्यमान नगरसेवकांपैकी अनेकांनी पाठ फिरविली. शहराध्यक्ष रमेश बागवे हे महाविकास आघाडीच्या बैठकीला गेले असल्याने ते उपस्थित राहू शकले नाहीत, असे कारण पक्षाकडून सांगण्यात आले.
आगामी निवडणूक महाविकास आघाडीच्या माध्यमातून लढविण्याचा विचार सुरू आहे. त्यावर काँग्रेसच्या वरिष्ठ नेत्यांनी अधिकृत भूमिका अद्यापही स्पष्ट केलेली नाही. परंतु शहर पातळीवरील पदाधिकाऱ्यांमध्ये त्यावर दोन मतप्रवाह आहेत. तसेच सिंगलचा वॉर्ड असावा की दोन वॉर्डांचा मिळून एक असावा, यावर देखील पक्षात मतभेद आहे. आज झालेल्या बैठकीत शिवरकर यांनी महाविकास आघाडीच्या माध्यमातून निवडणुकांना सामोरे जाण्याऐवजी काँग्रेसने स्वबळावर निवडणुकीच्या रिंगणात उतरावे. तसेच पक्षाने सिंगल वॉर्डसाठीच आग्रह धरावा, अशी भूमिका मांडली.
पाकीट संस्कृती बंद व्हावी
विधानसभा निवडणुकीत पक्षाकडून उमेदवारी मिळालेल्या एका नेत्याने या बैठकीत आपले मन मोकळे केले. निवडणुकीनंतर पक्षाच्या उमेदवारांचा का पराभव झाला, याचा आढावा घेण्याची गरज होती. कोणी काम केले, कोणी नाही, याचा जाब विचारला गेला पाहिजे होता. परंतु, कोणत्याही नेत्याला त्याची गरज वाटली नाही. उमेदवाराला पक्षाच्या नेत्यांकडून ‘पाकिटा’साठी कसा त्रास दिला जातो, याचा अनुभव मी घेतला आहे. ही पाकीट संस्कृती बंद झाली पाहिजे, असे तो नेता म्हणाला.
Edited By - Prashant Patil
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.