वेल्हे (पुणे) : ताई आम्हाला गेल्या दिड वर्षांपासून रेशनिंग मिळत नाही, ताई घरकुलांचे बील काढण्यासाठी ग्रामसेवक पैसे मागतात, ताई आमच्या येथे लाईटची समस्या अशा एक ना अनेक वैयक्तिक अडचणींच्या प्रश्नांवर खासदार सुप्रिया सुळे यांनी वेल्हे तालुक्यातील राष्ट्रवादीच्या पदाधिकारी यांची कानउघाडणी करत मला तीन महिन्यात काही बदल न दिसल्यास दर महिन्याला नागरीकांच्या समस्या सोडविण्यासाठी वेल्हेत यावे लागेल असे म्हणत नाराजी व्यक्त करत जनतेबद्दलची संवेदना दाखवली.

निमित्त होते वेल्हे तालुका आढावा बैठकीचे घेतली या बैठकीत नागरिकांनी तालुक्यातील समस्यांचा अक्षरक्षा पाढा खासदारांपुढे वाचला. मंगळवार (ता. १५) रोजी शिवगोरक्ष कार्यालय वेल्हे येथे आढावा बैठकीचे आयोजन करण्यात आले. यावेळी जिल्हा परिषदेचे उपाध्यक्ष रणजित शिवतरे, जिल्हाध्यक्ष प्रदीप गारटकर , बारामती मतदारसंघाचे महावितरणचे समन्वयक प्रविण शिंदे, माजी तालुकाध्यक्ष शंकरराव भुरुक, जिल्हासरचिटणीस आनंद देशमाने, माजी सभापती निर्मला जागडे, तालुकाध्यक्ष संतोष रेणुसे, प्रमोद लोहकरे, हनुमंत कार्ले, भोरचे उपविभागीय अधिकारी राजेंद्र जाधव व सर्व खात्याचे खातेप्रमुख उपस्थित होते.

या बैठकीत सर्वाधिक तक्रारी सार्वजनिक बांधकाम विभागाच्या आल्या चेलाडी वेल्हे रस्त्याच्या बाजूने पाण्याचा निचरा होण्यासाठी पावसाळ्यापुर्वी गटारे काढणे, साईडपट्ट्या काढल्या गेल्या नाहीत. तालुक्यातील रस्त्याची झालेली दुरवस्था, केळद खिंड मध्ये पडलेले खड्डे तीन वर्षे झाले बुजविले गेले नाहीत. याबाबतची तक्रार केळदचे सरपंच रमेश शिंदे यांनी केली. सोंडे ते चिरमोडी रस्त्याची देखील दुरवस्था झाली असल्याची तक्रार सरपंच अशोक सरपाले यांनी केली.

याबाबत सार्वजनिक बांधकाम विभागाचे उपअभियंता संजय संकपाळ यांना उत्तरे देता आली नाही. यांनी याबाबत वरिष्ठ अधिका-यांची बैठक लावुन याबाबत विचारणा केली जाईल असे खासदारांनी सांगितले.तर तालुक्यातील रेशनिंगचे अन्नधान्य सामान्य लाभार्थ्यास मिळत नसल्याची तक्रार राघु भुरुक यांनी केली. तर महावितरणचे सडलेले खांब बदलणे, गावांमध्ये ट्रान्सफार्मर बसविणे आदी तक्रारी करण्यात याबाबत खासदार सुप्रिया सुळे यांनी तालुक्यातील राष्ट्रवादीचे अध्यक्ष संतोष रेणुसे, माजी अध्यक्ष शंकर भुरुक यांनी आठवड्याच्या प्रत्येक शुक्रवारी कार्यालयात बसुन येथील ग्रामस्थांच्या समस्या सोडविण्याच्या सुचना दिल्या आहेत. स्टेजवर गर्दी करण्यापेक्षा कार्यकर्त्यांनी नागरीकांची कामे करावीत तालुका संघटनेतील संवेदनशीलपणा कमी झालाय का, असा प्रश्न विचारत तीन महिन्यात येथील नागरिकांच्या समस्या सुटल्या नाहीतर मला दर महिन्यास वेल्हेत यावे लागेल असेही यावेळी खासदार सुप्रिया सुळे यांनी सांगितले.