Dhule Crime News : लाकड्या हनुमान (ता. शिरपूर) येथील कापूस व तुरीच्या पिकात फुललेला गांजाचा मळा धुळे येथील एलसीबी आणि सांगवी पोलिसांनी केलेल्या संयुक्त कारवाईत उद्ध्वस्त करण्यात आला. जप्त गांजा मोजण्यासाठी पोलिसांना तब्बल दोन दिवस लागले.

या कारवाईत तीन कोटी १० हजार किमतीचा तब्बल ६० क्विंटल गांजा जप्त करण्यात आला.(3 crore ganja farm destroyed by Sangvi Police with Crime Investigation Team dhule crime news )

स्थानिक गुन्हे शोध पथकाचे पोलिस निरीक्षक दत्तात्रेय शिंदे यांना लाकड्या हनुमान शिवारात गांजाची मोठ्या प्रमाणावर लागवड केल्याची माहिती मिळाली. त्यांनी सहकाऱ्यांकडून माहितीची खातरजमा केल्यानंतर कारवाईची तयारी केली.

उपनिरीक्षक बाळासाहेब सूर्यवंशी यांनी सहकाऱ्यांसह सांगवी पोलिस ठाणे गाठून कारवाईबाबत सहायक पोलिस निरीक्षक जयेश खलाणे यांच्याकरवी मदतीची तरतूद केली. एक नोव्हेंबरला एलसीबी आणि सांगवी पोलिसांचे पथक लाकड्या हनुमान येथे रवाना झाले. त्यांनी परिसरात शोध घेत गांजाचे शेत हुडकून काढत तीन कोटीचा मुद्देमाल जप्त केला.

पोलिस अधीक्षक संजय बारकुंड, अपर अधीक्षक किशोर काळे यांच्या मार्गदर्शनाखाली एलसीबीचे पोलिस निरीक्षक दत्तात्रेय शिंदे, सहायक निरीक्षक जयेश खलाणे, उपनिरीक्षक बाळासाहेब सूर्यवंशी, पंकज खैरमोडे, महेंद्र सपकाळ, मयूर पाटील, योगेश जगताप, किशोर पाटील, जगदीश सूर्यवंशी, देवेंद्र ठाकूर, राजू गिते, राजू भिसले, सुनील वसावे, राजू देसले, स्वप्नील बांगर, प्रकाश अहिरे, योगेश मोरे आदींनी ही कारवाई केली.

१ हजार ६८० झाडे

संशयित शेतमालक व गांजाची लागवड करणारा देवा कहारु पावरा (रा. लाकड्या हनुमान) फरार झाला. स्थानिक पोलिस पाटील यांना बोलावून पोलिसांनी शेतमालाच्या नावाची खातरजमा केली. नंतर गांजाच्या शेताकडे पोलिसांनी मोर्चा वळवला. कापूस व तुरीच्या पिकात वाढलेली गांज्याची एक हजार ६८० झाडे आढळली. पोलिसांनी गांजाचा संपूर्ण मळा उद्ध्वस्त करीत झाडे उपटून काढली. त्यांचे एकूण वजन सहा हजार दोन किलो भरले. या मुद्देमालाची किंमत तीन कोटी १० हजार रुपये आहे. हवालदार महेंद्र सपकाळ यांनी दिलेल्या फिर्यादीनुसार संशयित देवा पावरा यांच्या विरोधात गुन्हा दाखल करण्यात आला.

पथकाला रिवॉर्ड

गांजा प्रकरणी पोलिस अधीक्षक संजय बारकुंड यांनी पोलिस निरीक्षक दत्तात्रेय शिंदे यांच्यासह एलसीबीच्या पथकाला वीस हजार रुपयांचा रिवॉर्ड जाहीर केला.