Nashik Water Scarcity : पावसाळा संपण्याच्या मार्गावर असताना जिल्हाभर अजूनही वरुणराजा मनसोक्त बरसला नसल्याने शेतकऱ्यांचे कोट्यवधीचे नुकसान झाले आहे. पावसाचे माहेरघर दुष्काळीपट्टा देखील वंचित राहिल्याने जिल्ह्यातील केवळ दिंडोरी तालुक्यात आणि १११ पैकी फक्त ११ महसूल मंडळात (सर्कल) पर्जन्यमानाची वार्षिक सरासरी ओलांडली आहे.

भौगोलिकदृष्ट्या विभाजन, पर्जन्यछायेचा प्रदेश आणि पर्यावरणाचे बिघडलेले संतुलन यांसह विविध भौगोलिक कारणांमुळे पावसाचे स्वरूप बदलत आहे. त्यातच जिल्ह्यातील मालेगाव, येवला, सिन्नर, नांदगाव, चांदवड व देवळा या तालुक्यांवर नेहमीच पावसाची मात्रा रुसलेली दिसते. (Dindori taluka and 11 revenue circle exceeds annual average rainfall nashik news)

जिल्हा दर वर्षीच पर्जन्याबाबतीत पूर्व व पश्चिम भागात विभागला जातो. यंदाही असेच चित्र असून, कुठे कमी तर कुठे जास्त पावसाची नोंद झाली असली तरी जिल्ह्याची वार्षिक सरासरी १०२३ मिलिमीटर असताना आतापर्यंत केवळ ६४५ मिलिमीटर पाऊस पडला आहे. मागील वर्षी हेच प्रमाण १२९ टक्क्यांवर होते.

एकट्या दिंडोरीने ओलांडली सरासरी

जिल्ह्यातील १५ पैकी केवळ दिंडोरी तालुक्यात यंदा १०७ टक्के पाऊस पडला असून, उर्वरित तालुके ८० टक्क्यांच्या खालीच आहेत. सर्वाधिक कमी पाऊस नांदगावमध्ये ५४, सिन्नरमध्ये ५८, तर मालेगाव, चांदवडमध्ये ६२ टक्के पाऊस पडला आहे.

ननाशी मंडळात सर्वाधिक २७२ टक्के पावसाची नोंद झाली आहे. याउलट करंजाळी मंडळात अवघा २६, विंचूर मंडळात ३० टक्के, ठाणपाडा, नांदगाव (इगतपुरी) मंडळात अवघा ३१ टक्के पाऊस पडल्याचे चित्र आहे. यंदा सुरवातीपासून पावसाने दडी मारल्याने जिल्ह्यातील धरणे सरतेशेवटी भरलेत.

१०० मंडळे तहानलेले!

जिल्ह्यातील वेगवेगळ्या तालुक्यांत फक्त ११ महसूल मंडळांनी सरासरीचे शतक गाठले आहे. कळवाडी, मुल्हेर, दळवट, अभोना, उमराळे, ननाशी, कोशिंबे, कसबे वणी, पांढुर्ली, नायगाव आणि अंदरसूल या ११ मंडळांतच या वर्षी सरासरीची शंभरी ओलांडली आहे. याव्यतिरिक्त १०० मंडळे मात्र पर्जन्यछायेतच राहिली असून, ७५-८० टक्क्यांच्या दरम्यान येथे पाऊस पडला आहे.

याशिवाय वडांगळी, वावी, राजापूर, ठाणपाडा, दाभाडी, बाणगाव, रामशेज, नांदगाव, टाकेद, करंजाळी, विंचूर, ठाणपाडा आदी १५ मंडळांत ४० टक्क्यांपेक्षाही कमी पाऊस पडल्याने आत्ताच येथे पाणीबाणीची परिस्थिती निर्माण झाली आहे. नांदगाव, सुरगाणा, नाशिक, इगतपुरी, पेठ, चांदवड, त्र्यंबकेश्वर या तालुक्यांत एकाही मंडळाला सरासरी ओलांडता आलेली नाही.

असे आहे वार्षिक पर्जन्यमान अन् पावसाचे आकडे !

तालुका - वार्षिक पर्जन्यमान - झालेला पाऊस - टक्के

नाशिक - ७८१ - ५३० - ६७

इगतपुरी - ३१६८ - १६७५ - ५२

दिंडोरी - ७६२ - ८१७ - १०७

पेठ - २१२४ - १५०० - ७०

त्र्यंबकेश्वर - २२४४ - १६१६ - ७२

मालेगाव - ५३९ - ३३२ - ६१

नांदगाव - ५८३ - ३१५ - ५४

चांदवड - ६०९ - ३८५ - ६३

कळवण - ७३६ - ६३१ - ८५

बागलाण - ५६७ - ३६७ - ६४

सुरगाणा - १९९२ - १५०५ - ७५

देवळा - ५०९ - ३०५ - ५९

निफाड - ५४६ - ३५२ - ६४

सिन्नर - ६३० - ३६८ - ५८

येवला - ५४४ - ४१७ - ७६

जिल्हा सरासरी - १०२३ - ६४५- ६९