साल्हेर (जि. नाशिक) : सटाणा शहरापासून पन्नास किलोमीटर अंतरावर व गुजरात राज्याची सीमा १५ किलोमीटर असलेला साल्हेर किल्ला विकासापासून वंचित आहे. विशेष म्हणजे गेल्या पाच वर्षांपूर्वी साल्हेर गाव दत्तक घेतलेले असतानाही परिसराचा फारसा विकास झालेला नाही.

लोकप्रतिनिधींच्या दुर्लक्षामुळे विकास खुंटला...

साल्हेर किल्ला पर्यटनस्थळ असल्याने महाराष्ट्रासह गुजरात व इतर राज्यातून पर्यटक मोठ्या संख्येने येतात. किल्ल्याच्या विकासासाठी कोट्यवधींचा निधी तसेच, छत्रपती शिवाजी महाराजांचे भव्य शिवस्मारक उभारण्याची घोषणा आमदार दिलीप बोरसे यांनी मोठा गाजावाजा करत केली होती. त्याच दिवशी लोकसहभागातून चौदा ते पंधरा लाख रुपये जमा झाल्याची माहिती खुद्द आमदार बोरसे यांनीच दिली होती. मात्र, कित्येक दिवसांपासून साल्हेर किल्ला व परिसर विकासासंदर्भात अद्याप कुठलीच पावले उचलण्यात आलेली नाही. आजी- माजी लोकप्रतिनिधींच्या दुर्लक्षामुळे या भागाचा विकास खुंटल्याचा आरोप नागरीक करीत आहेत.

साल्हेर किल्ल्यावर छत्रपती शिवाजी महाराजांच्या (Chhatrapati Shivaji Maharaj) काळातील शिव मंदिर, परशुराम बाबा मंदिर, कालिका देवी मंदिर, पाण्याचे तळे किल्ल्याचे दरवाजे, गुप्त गुहा या शिवकालीन वास्तू पर्यटकांना बघावयास मिळतात. या भागाचा विकास झाल्यास बागलाण तालुक्याचे मोठे पर्यटनस्थळ होऊन वैभवात भर पडेल. स्थानिक आदिवासी तरुणांचा रोजगाराचा प्रश्‍न यानिमित्ताने मार्गी लागू शकतो.

"साल्हेर किल्ला पावसाळ्यात निसर्गाने फुलून गेलेला असतो. अशावेळी परिसरात विकासकामे झाली तर पर्यटकांची मोठी गर्दी होऊ शकते. मात्र, हिवाळ्याचे काही दिवस गेल्यानंतर साल्हेर किल्ला पूर्णपणे उजाड दिसतो. उन्हाळ्यात या भागात पर्यटक येत नाही. विकासकामांना चालना देऊन साल्हेर किल्ला व परिसरात विकासकामांना चालना द्यावी."

- राणी भोये, सरपंच, साल्हेर

"साल्हेर किल्ला व त्या अंतर्गत येणाऱ्या परिसराच्या विकासाला लवकरच चालला मिळेल. या परिसरात गायकवाड राजवटीच्या जुन्या काही इमारती आहेत. त्याही महाराष्ट्र राज्य सरकारकडे वर्ग झाल्या की नाही, याचाही पाठपुरावा सध्या सुरू आहे. साल्हेर किल्ला परिसरात शिवाजी महाराजांचे भव्य स्मारक करून विकासासाठी कटिबद्ध आहे."

- दिलीप बोरसे, आमदार, बागलाण