अमरावती : प्रेमात माणूस काहीही करण्यास तयार होतो, असे सांगितले जाते. परंतु नुकतीच वयात आलेली तरुणाई शारीरिक आकर्षणापोटी काय करेल, काही सांगता येत नाही. सोशल मीडियामुळे तरुणाईची प्रेमप्रकरणे वाढत असून यामुळे पालकांच्या जीवाला घोर लागला आहे. तरुणाईच नव्हे तर पालकांच्या डोळ्यांत झणझणीत अंजन घालणारी घटना नुकतीच उघडकीस आली.   

तो एकोणवीस वर्षांचा... ती सोळा वर्षांची... फेसबुकवरून त्यांची ओळख झाली... ओळखीचे रूपांतर मैत्रीत झाले... नंतर त्यांची चॅटिंग सुरू झाली... काही दिवसांनी त्याने तिच्यापुढे प्रेमाचा प्रस्ताव ठेवला... एवढ्या कमी वयात लग्नाचा प्रस्ताव ठेवल्याने ती चकीत झाली... मात्र, तिने ‘मी तुला सोडते’ या शब्दात स्पष्ट नकार दिला. संतापल्याने त्याने ही धमकी दिली आणि प्रकरण वेगळ्या वळणावर गेले...

वाचा - सावधान! सर्वात मोठ्या धरणाचे 33 दरवाजे उघडले.. इतिहासातील सर्वात मोठा पाण्याचा विसर्ग; जिल्ह्यात पुराचा धोका वाढला
 

पोलिसांनी दिलेल्या माहितीनुसार, काही दिवसांपूर्वी मंगरूळदस्तगीर ठाण्याच्या हद्दीतील एका अल्पवयीन युवतीची (वय १६) फेसबुक अकाउंटवरून मोहन बाबूराव सोळंके (वय १९, रा. लोणगाव, जि. बीड) येथील युवकासोबत ओळख झाली. तिचा मोबाईल नंबर मिळवून फेसबुक फ्रेण्ड्‌स झाल्यानंतर त्याने तिच्याशी संपर्क सुरूच ठेवला. काही दिवसांपूर्वी मोहनने अचानक नुकतीच मैत्री झालेल्या अल्पवयीन युवतीपुढे आधी प्रेमाचा आणि लगेच लग्न करण्याचा प्रस्ताव ठेवला.

युवतीला भेटण्यासाठी त्याने तगादा लावला. त्यानंतर आपला सोशल मीडियावर झालेला मित्र जरा वेगळ्या मार्गाने जात असल्याचे बघून तिने त्याला ‘मी तुला सोडते’ अशा शब्दांत सुनावले. त्यावर त्याने प्रतिउत्तर देताना ‘तू सोडले तर, विषारी द्रव्य प्राशन करून आत्महत्या करेल’, अशी तिला धमकी दिली. घडलेल्या प्रकारामुळे घाबरलेल्या अल्पवयीन युवतीने मंगरूळदस्तगीर ठाण्यात तक्रार नोंदविली. याप्रकरणी पोलिसांनी संशयित मोहन सोळंकेविरुद्ध गुन्हा दाखल केला आहे.

हेही वाचा - या सापाच्या किंमतीचा तुम्हाला अंदाजही नाही येणार, पण ब्लॅक मार्केटमध्ये इतकी डिमांड असण्याचं कारण तरी काय?
 

पोलिसांनी केले गुन्हे दाखल

अल्पवयीन युवतीच्या प्रेमात पार वेडा झालेल्या युवकाने तिच्या नकारानंतर प्रयत्न सुरूच ठेवले. तू सोडत असशील तर ‘मी विष घेऊन आत्महत्या करेल’, असा पवित्रा त्याने घेतला. संशयित आरोपी मोहनविरुद्ध मंगरूळदस्तगीर पोलिसांनी विनयभंगासह स्वत:ही आत्महत्या करण्याची धमकी दिल्याप्रकरणी गुन्हा दाखल केला आहे.

युवकापर्यंत पोहोचण्याचा प्रयत्न
कमी वयात सोशल मीडियाचा वापर शक्‍यतोवर टाळायला हवा. अनोळखी व्यक्तीला फेसबुक फ्रेण्ड करताना आपली व्यक्तिगत माहिती देण्याचे टाळावे.  पीडित युवती कथित मोहन सोळंके याला कधी भेटली नाही. त्यामुळे तांत्रिक तपासाच्या आधारे या युवकापर्यंत पोहोचण्याचा पोलिसांचा प्रयत्न राहील.
- श्‍याम वानखडे,
पोलिस निरीक्षक, मंगरूळदस्तगीर ठाणे.