नांदेड : रस्त्याच्या कडेला थांबलेल्या ट्रकला अचानक आग लागली. यात कॅबिनमधील तरुण ट्रकचालक जळून खाक झाल्याची धक्कादायक घटना रविवारी (ता.२७) पहाटे एकच्या सुमारास घडली आहे. ही घटना नांदेड-बिदर राष्ट्रीय महामार्गावर घडली आहे. या घटनेबाबत पोलिसांनी माहिती दिली, की कंधार तालुक्यातील हाळदा येथील ट्रकचालक नितीन सटवाजी कांबळे व रमेश लालू वाघमारे शनिवारी (ता.२६) गोदिंया येथून ट्रकमध्ये ( एमएच ४० बीजी ९६०४) तांदूळ घेऊन नांदेडमार्गे (Nanded) लातूरकडे (Latur) जात होते. रात्री साधारण नऊ वाजेच्या सुमारास नवीन नांदेड येथील बिजली हनुमान मंदिराजवळ ट्रक थांबवली. (Suddenly Set Fire Truck In Nanded, Truck Driver Burned)

रमेश वाघमारे घरी जेवणासाठी निघून गेले. ट्रकचालक नितीन कांबळे ट्रकमध्ये झोपले होते. वाघमारे पहाटे एकच्या सुमारास ट्रककडे आले. त्यांना ट्रक पूर्णपणे जळून खाक झाल्याचे दिसले. मात्र ते येण्यापूर्वीच अग्निशामक दलाने ट्रकला लागलेली आग नियंत्रणात आणली होती. रमेश वाघमारे यांनी ट्रकच्या कॅबिनमध्ये पाहिले असता नितीन कांबळे जळून खाक झालेला दिसला.

आगीचे कारण स्पष होऊ शकलेले नाही. या प्रकरणी नांदेड ग्रामीण पोलिस ठाण्यात आकस्मिक मृत्यूची नोंद करण्यात आली आहे. पुढील तपास पोलिस अंमलदार शेख जावेद करित आहेत.