Nashik Cidco Crime : टिप्पर टोळीच्या नावाखाली सिडको, पंचवटीत दहशत माजाविणाऱ्या आणि चार दिवसांपूर्वीच फिल्मी स्टाईलमध्ये सिडकोतील शिवाजी चौकात संदीप आठवले यांचा भरदिवसा खून करणाऱ्या संशयित ओम्या उर्फ छोटा खटकी उर्फ ओम चौधरी याच्यासह तिघांविरोधात मारहाणीचा गुन्हा दाखल करण्यात आला आहे.

सदरचा प्रकार कॉलेजरोड परिसरातील चाय केटली कॅफे येथे घडला होता. (Another case filed against Omya Khatki cidco nashik crime news)

प्रणव प्रभाकर आगळे (रा. संत कबीरनगर, गंगापूर रोड. मूळ रा. गवळी पिंप्री, ता. सोनपेठ, जि. परभणी) याच्या फिर्यादीनुसार, गेल्या १८ तारखेला दुपारी साडेचार वाजेच्या सुमारास तो कॉलेज रोडवरील चाय केटली कॅफेत बसलेला होता.

त्यावेळी संशयित ओमप्रकाश पवार उर्फ खटकी, ओम चौधरी उर्फ छोट्या खटकी, मॅगी मोरे, प्रणय पगार (सर्व रा. सिडको) हे त्याठिकाणी आले. मागील भांडणाची कुरापत काढून संशयितांनी प्रणव आगळे यास शिवीगाळ करीत लाकडी दांडक्याने बेदम मारहाण केली होती. परंतु संशयितांच्या दहशतीमुळे त्याने पोलिसात तक्रार केली नव्हती.

दरम्यान, गेल्या गुरुवारी (ता.२४) संशयितांनी सिडकोत संदीप आठवले याचा खून केला. त्याप्रकरणात संशयितांना अटक करण्यात आली.

हेही वाचा : Credit Card फसवणूक....काय घ्याल काळजी?

त्यामुळे प्रणव आगळे याने गंगापूर पोलिस ठाणे गाठून संशयितांविरोधात फिर्याद दिली. त्यानुसार संशयितांविरोधात मारहाणीचा गुन्हा दाखल करण्यात आला आहे.

टिप्पर टोळीच्या नावाने दहशत

संशयित ओम्या खटकी हा सिडकोतील कुख्यात टिप्पर टोळीच्या नावाखाली दहशत माजवित होता. अल्पवयीन असल्यापासून त्याच्यावर मारहाणी, धमकावणे, चोऱ्यांचे गुन्हे दाखल आहेत. मात्र अल्पवयीन असल्याने कठोर कारवाई होत नसल्याने त्याची मुजोरी वाढली.

त्यातूनच त्याने गेल्या गुरुवारी संदीप आठवले याचा पूर्ववैमनस्यातून भरदिवसा खून केला. ओम्या खटकीचे काही मित्र हे पंचवटी परिसरातही असल्याने त्याही भागात त्याने दहशत माजविली होती.